Aizawl: Nimin (Pathianni) kha Pentikos Ni a ni a. He ni hi khawvel pumah Kristian te chuan urhsun takin an hmang thin a ni. Mizorama kohhran hrang hrangte pawhin he ni hi an hmang.
Presbyterian kohhran chuan kohhran ni pawhmawh a nih avangin special programme-in an hmang a. Thupui inang tlang an zir ho a. Chawhma inkhawmah thupui atan ‘Thlarau thianghlim – Sual hriattirtu’ tih hmangin, chawhnu inkhawmah ‘Thlarau Thianghlim – Chhandama kawnga hruaitu’ tih leh zan inkhawmah ‘Thlarau Thianghlim – felna kawnga hruaitu’ tih thupui an hmang a ni.
Zan inkhawmah PCI General Assembly pualin tawngtai rual hun an hmang a, zan inkhawm thawhlawm pawh PCI General Assembly pual tur niin, thawhlawm lakkhawm te hi Bial Treasurer kaltlangin Synod Office-ah thehluh tur a ni.
Salvation Army chuan chhunah Thianghlimna Inkhawm leh zanah Chhandamna Inkhawmah an hmang a, thupui thlan sa ‘Thlarau thianghlim ringtu nunah’ tih an ngaithla.
Pentikos chu Grik tawng a ni a, ‘Sawmngana’ tihna a ni a. Thuthlung Hlui-ah chuan Kalhlen Kut tiak ni atanga ni sawmnganaah an hmang thin a, Thuthlung Thar hunah erawh chuan Isua thawhleh tuk (Easter) atanga ni 50-naah hman a ni.