Aizawl: MNF Adviser Er Lalzirliana, MLA chuan ZPM sorkarin kawng siamna atana hman turin petrol leh diesel atanga chhiah nasa taka a tipung chung hian hmun tinah kawngpui a chhe em em a, national highway chhiat lai ber a thleng mek tih a sawi.
Nimina Mizo Hnam Run chhung inkhawmah Er Lalzirliana, MLA chuan petrol leh diesel atanga chhiah nasa taka an tihpun, kawng siamna atana hman tur an tih hi ZPM sorkar hian engzat nge an hman tawh tih hi hriat a chakawm tih sawiin, “Kan kawngpuite, hmun tinah a chhe em em vek si a. Kan National Highway chhiatlai ber kan thleng mek bawk a. Mipuiin harsatna namenlo kan hmachhawn mek a ni,” a ti.
Mamit bialtu MLA ni bawk chuan POL atanga chhiah lak tihsan hian lirthei nei ve lote leh mirethei zawkte nasa takin a nghawng vek tih a sawi a. Kum 20 chuang OIL industry-a a thawh ve chhungin India ram khawi hmunah mah hetiang taka chhiah tihsan hi a la hriat ngai loh thu sawiin, “Kan nitin mamawh man nasa takin a san phah a, miharsa zawkte tan rum vawng vawng na tham a ni,” a ti.
Er Lalzirliana chuan ZPM sorkar chu an intiam a, mipui rilruk suk nan leh intih rinawm nan, danglam bik an tiam a. An danglamna langsar tak chu an hmel a ni tiin, “GST kan la minus zat zat maite hi danglamna duhawmlo tak a ni. Support price, crop insurance, D-A-H dah tihte chu hlawhtlina hmuh tur a ni,” tiin MNF sorkar kha tuma dem lova hmasawna hna thawk mai thin an nih thu leh infrastructure liantham zawng zawng deuhthaw hi MNF kutchhuak a ni tih mipuiin an hriat thu a sawi bawk.