Sairang thlenga rel lo lut turin hun rei tawh tak atang khan hmalakna a kal mup mup reng a, tunah a hlawhtlinna lang chho zelin, tlanchhinna pawhin rah duhawm a chhuah zel niin a hriat.
Rel lo lut hian nasa takin kan nitin khawsakna kawngah leh kan nitin mamawh phuhrukna kawngah min chhawk ngei ang tih a rinawm a, kan kawtkaiah, kan ban phak maiah nasa takin awlsamna kan nei dawn. Hei ringawt pawh hi ropui tak a ni.
Hmasawnna hnathawh leh ke penna a awm ruala kan hriat tur erawh lo inven a ngai tih hi a ni. Inven lawk dan kan thiam loh chuan min hual veltu hnam hi an tam ropui mai si a, kawng engkimah min tamchhuahin, kan buzawl hi an la rawn luah zui duh mai ang tih kan hriat kar a ngai.
Tunah chuan a bul kan la tan dawn laih laih chauh a ni a, hmasawnnain a ken tel eibar zawn leh chetvel awlsamna hian min han luhchhuah tak tak anga, kan tu leh fate chenna tlaka kan ram chin hi chu kan lo humhalh tlat a tul hle.
Mizoram hi dan felfai tak hmangin kan ram lo lut duh vaihote phalna lak hmasak ngaia siamsak kan ni a, hei hi min awptute hian hnawk an tiin, kan politician te thlengin nuaibo tura karna an rawn nei chamchi thin. He kan inhungbingna hi kan venhim that sauh sauh a, a check na hmunah pawh khirh leh zuala hma kan lo lak ve a tul awm e. Aizawl atanga khulai mai khu Sairang a ni a, vai lo lut ruih ruih mai tur hi kan lo dan thiam ve zel a tul dawn. I lo inbuatsaih sauh sauh ang u.