Green Mizoram Day chu nimin khan Mizoram pumah hman a ni. A hmanna pui ber hi Thenzawl Golf Course-ah neih niin Environment, Forests & Climate Change Minister Lalthansanga chu khuallian a ni.
State Level Sub-Committee on Green Mizoram Day Chairman ni bawk Lalthansanga, Minister chuan Mizoram chhungah ram ngaw tihchereu nasat lutuk avangin tui hna a tlem tial tial a, Mizo pi leh puten sik leh sa an thliar dan pawh tunah chuan hman hleihtheih a ni tawh lo tih sawiin, “Hei hi neitu thinlung pu loa mikhual ang maia kan ramngaw te kan enkawl vang a ni,” a ti.
Lalthansanga chuan Green Mizoram Day hi rilru leh tih tak zeta hmang tur leh, thing leh mau leh nungchatete humhalh a, thingphun uar tur te, bawlhhlawh paih dan pawh fimkhur turin mipui a chah.
He hunah hian EF&CC Minister Lalthansang chuan kangmei venna kawnga district tithate hnenah lawmman a hlan nghal. District level-ah pakhatna dawngtu chu Lungei district an ni a, pahnihna Serchhip district leh pathumna Aizawl district an ni.
Serchhip District chhunga kangmei venna kawnga tithate hnenah lawmman sem a ni bawk a. Lawmman pakhatna dawngtu chu Leng khua an ni a, pahnihna Zote South leh pathumna Ngentiang khua an ni.
Ramsa leh nungcha humhalhna kawnga thawk thate leh Mizorama thing leh mau tipung tura titha pawl hrang hrangte hnenah lawmman sem a ni bawk a. Zuchhip YMA, Sairep Village Community leh Serchhip Sub Hqrts YMA ten sumfai Rs 83,000 bakah waiting shed sakna tur an dawng a ni.
Kumin Green Mizoram Day thupui chu ‘Ruah tui khawl nan thing i phun ang u’ tih a ni.
Raj Bhavan-ah larsapin thing phun
AZL: Mizoram hmun dangte rualin nimin zing khan Raj Bhavan-ah Green Mizoram Day, 2025 puala hun hman a ni a. He hunah hian Larsap General Vijay Kumar Singh leh Lady Governor Bharti Singh te chuan Upper Lawn, Raj Bhavan-ah Mizoram State Tree, Herhse tiak an phun.
He hunah hian Latsap Gen. Vijay Kumar Singh chuan Raj Bhavan-a Green Mizoram Day, 2025 hman a nih theih nana Environment, Forests & Climate Change (EF&CC) Department-te hmalakna chu fakin, kalkhawm zawng zawngte chungah lawmthu a sawi.
Larsap chuan Mizoram chu hmun dangte ngaihtuaha hmun hring tamna leh thing leh mau pawh engemawzah awmna ni mah se, khawvel pumah sik leh sa a inthlak danglam nasat avangin hemi lo do let tur hian uar zawka thingphun beihpui thlak zel a tul thu leh thing phun enkawl zui kawngah theihtawp chhuah a tul thu a sawi.
Raj Bhavan-a Green Mizoram Day puala hun hmanah hian Ajit Roy, Secretary to the Governor, Arti Choudhary, Chief Conservator of Forests, Lalnunsanga Khawlhring, Divisional Forest Officer, Aizawl Forest Division-te bakah Raj Bhavan leh EF&CC Department thawktute an tel.
Aizawlah Green Mizoram Day
AZL: Green Mizoram Day pualin Mizoram hmun hrang hrangah hun hman niin, thingphun hnatlangte neih a ni.
Aizawla Green Mizoram Day hmanna pui ber chu Mizoram Pollution Control Board (MPCB) buatsaihin Zokhawsanga 34th Assam Rifle Complex-ah neih a ni a, Aizawl South III bialtu MLA Baryl Vanneihsangi’n a hmanpui.
He hunah hian ‘Ruah tui khawl nan thing i phun uar ang u’ tih thupui hmangin environment venhim kawnga inzirtirna leh ram kang ven kawnga titha khuate hnenah lawmman sem nghal a ni bawk.
Zokhawsangah hian MPCB thawktute pawhin nikum Green Mizoram Day-a thing an lo phun tawhte en felin, an hnatlâng nghal. Hei bakah hmun hrang hranga lirthei khu test-na hmunahte thing an phunin, nilengin an office leh a chhehvelte tifaiin an hnatlang nghal bawk.
Green Mizoram Day denchhen hian MPCB chuan kum tina an lo tih thin angin thing tiak phun tur thahnem tak an la khawm leh a, sikul leh college hrang hranga Eco club-te phun turin an sem chhuak leh a ni.