Kobe Bryant-a jersey hak hmasak ber an lilam a, New York khawpuia lilamna hmun lar, Sotheby’s-ah $ maktaduai sarih zetin an hralh.
He jersey hi Bryant-a’n Los Angeles Lakers pre-season leh regular season bul a tan laia a hak a ni.
Jersey an chhui zuinaah NBA huanga Bryant-a tel tan kum, 1996-97-ah khan thlalak atangin a ha tan a ni tih an finfiah.
October 16, 1996-a pre-season a khelh hmasak ber leh November 3, 1996-a regular season bul a tanna bakah NBA a luhchilh hnua media a hmachhawn hmasak berah pawh a ha a ni.
Infiamna huanga jersey hralh tawh zingah chuan Bryant-a jersey hi to lama palina niin, Babe Ruth jersey ($ maktaduai 24), Michael Jordan 1998 NBA Finals jersey ($ maktaduai 10.1) leh Diego Maradona 1986 World Cup Argentina jersey ($ maktaduai 9.3) te chiah a chungah hian an awm a ni.
Bryant-a thil an lilam tawh zingah chuan a jersey hi an hralh to ber a la ni a. A hmaa an hralh to ber chu 2007-08 MVP season jersey kha niin, a hming a ziah thlapna jersey kha $ maktaduai 5.85-in an hralh a ni.