Aizawl: BJP Mizoram chuan Prime Minister Narendra Modi kaihhruai sorkar kum 11 tlin lawmna kal zelah nimin khan Aijal Club-ah ‘Professionals Meet’ an buatsaih.
BJP Mizoram President Vanlalhmuaka’n ‘Professionals Meet’ an buatsaih chhan sawiin, kum 11 chhunga BJP leh NDA kaihhruai sorkar hnuaia India mi vbc 142 te’n kum 2047-a India-in zalenna a neih kum 100-na tlin huna Developed India (Viksit Bharat) a nih theihna atana khua leh tuite hnena kum 11 chhunga hmasawnna lungphum an phum inhrilhna campaign peng pakhat a nih thu a sawi.
Vanlalhmuaka chuan sorkar laipui scheme hnuaiah Mizoramah hlawhtling takin hmeichhia zaa 53-te chu Jan Dhan account hawnsak a nih thu te, Collateral-free loans, PM MUDRA loan atan Rs. vbc 2,635 pek chhuah a nih tawh thu te, Stand-up India hnuaiah Loan Account 655 hawn a ni tawh thute, kawtthlera sumdawng 2,500 chuangte te hnenah PM SVANidhi hnuaiah loan pek an nih tawh thu te, Jal Jeevan Mission (Water for All) hnuaiah tui connection thar nuai 1.24 chuang pek a nih tawh thute a sawi.
Heng bakah Housing for All hnuaiah thingtlang khua bikah 24,546 leh khawpuiah 24,243 in sak zawh a ni tawh thu te, Swachh Bharat Mission hnuaiah chenna in 47,100 te tan ek in sak a nih tawh thu te, Ayushman Bharat hnuaiah nuai 5.71 in hamthatna an hmu tawh thute, Ujjwala Mission hnuaiah chhungkaw 36,000 chuangin a thlawnin gas connection an dawn tawh thu leh, PM Garib Kalyan Anna Yojana hnuaiah mi nuai 6.83 hnenah a thlawnin ration pek an nih bakah, PM Kisan hnuaiah loneitute tanpuina nuai khat hnenah kum khat chhungin Rs.6,000 pek an nih tawh thute a sawi bawk.
Inkhawm hi Vanupa Zathang, IPS (Retd), State Vice President in a kaihruai a, Lawmkunga, IAS (Retd) leh Lalhriatrenga Chhangte te chuan thupu thlan bik neiin PM Modi-a sorkarin kum 11 chhunga a hmalakna hrang hrangte an sawi a. Lalramdinfela, State IT Convener chuan BJP sorkar kum 11 chhunga a hmalakna hrang hrang video tawiin a entir a. He huna kalkhawmte atangin thusawi ngaihthlak a ni bawk.