Mizorama ei rawngbawlna gas burah tui pawlh a tam a; Mizoram chhunga khawih chingpen a tam bakah state pawn atanga chingpensaa lut tam zawk chu Cachar district-a tihchingpen nia hriat a ni.
Ningani khan Supply Minister B Lalchhanzova’n hovin a pisa-ah Supply department, Legal Metrology, IOCL leh gas agency hotuten ei rawngbawlna gas tihchingpen chungchangah sawi hovin an thukhawm a. Minister chuan mipui hnena gas thlentute chu IOCL an ni emaw, distributor pawh ni se, mipuiin gas buk tling, pawlh dal loh an dawn theihnan tan lak a tul thu a sawiin, inpawhtawn taka hma lak a tul thu a sawi.
Supply minister chuan rinawmna leh dikna nen sumdawnna chu kalpui a tul thu sawiin, IOCL lam pawh an system-te that tawk viau mah se, tan la leh zual turin a chah a. Legal Metrology pawh uluk zawkin endik thin se a duh thu a sawi.
Thutkhawmah hian Mizorama gas burte chu tui pawlh a tam thu sawi lan niin, gas hi Mizoram chhunga tihchingpen leh state pawn atanga chingpen saa lut a awm nia a lan thu leh, a tam zawk chu Mizoram pawn, Cachar district-a khawih chingpen niin a hriat a ni a. Mizoram chhungah pawh khawih chingpen awm thin tih report chu an ngai thu tak tih an sawi.
Cachar district thuneitute hnenah Kolasib bawrhsapin hma lo la tura ngenna siam se tih leh Kolasib bawrhsap chuan a huam chhungah gas tihchingpenna hmun nia sawite chu lo vai tura an rel bakah, IOCL-in thla tin agency tina gas an pek chhuah zatte FCS&CA Department-ah report theh lut turin an rel bawk.