Aizawl: Republic Veng Branch YMA chuan LBS Suzuki 22nd Inter Branch YMA Football 2025 champion leh YMA Day an lawm a. He hunah hian Sports Minister Lalnghinglova Hmar chuan khuallian niin a hmanpui.
Champion lawmna hi Republic Veng Community Hall-ah neih a ni a, bialtu MLA C. Lalsawivunga leh MP (Rajya Sabha) K. Vanlalvena te sial thawh hmangin ruai nen champion lawmna hi an hmang a. Republic Veng MC&DC ten champion hlado-in lawmna bul an tan a ni.
Khuallian Lalnghinglova Hmar chuan Republic Veng champion a lawmpui tih sawiin, talent nei tha zawng zawng an thleng sang chuan loh thu leh vanneih tel a ngaih thu a sawi a. “Lehkha thiam hi eizawnna chu a ni,” tiin, zirna leh infiamna kaihkawp thiam a pawimawh thu a sawi.
Excise minister ni bawk, Lalnghinglova Hmar chuan “Dam rei zawngah thu kan nei lo a, kan dam tawi zawng chu kan thiam loh a ni ve bawk. Zu in nasat lutuk avangte, inchiu avangte, kan khawsak phung dik tawk lo avangte, zuk leh hmuam avangtein Mizo kan thi nasa lutuk, kan harh thar a ngai,” tiin, a bik takin mipa te an dam rei a ngai a. Tun ang zela an kal chuan a zuih zawngin an kal a, he hnam hi a awm zel theih nan chuan an pian pun a ngai tih a sawi.
Republic Veng Branch YMA hian zirlai ti tha chawimawina a nei nghal a. He hunah hian uaptu MP (Rajya Sabha) K. Vanlalvena, Agriculture minister P.C Vanlalruata, Ward No. XVII Corporator David Zohmangaiha bakah Central YMA President Lalhmachhuana ten thu an sawi bawk.