Aizawl: Nghalchawm branch YMA-in YMA Day an lawmna chu MPCC Adviser Zodintluanga Ralte-in Inrinni khan a hmanpui.
Nghalchawm Community Hall-a YMA Day lawmnaah hian minister pawh lo ni tawh Zodintluanga Ralte chuan MLA a ni tawh lo chunga Nghalchawm branch YMA-in YMA Day hmanpui tura an sawm chu lawmawm a tih thu a sawi a. Nghalchawm khua chu khaw taima leh thawkrim tak an ni tih sawiin, ran vulh, a bikin vawk vulh lamah pawh an kal nasa hle a, chhungkaw tam takin an hlawhtlinpui avangin thinlung taka a lawmpui thu a sawi.
Zodintluanga Ralte chuan ram dan an zawm a, Mizo nunze mawi an chhawm nun zel hi nationalism dik a nih thu leh hnam chhanna dik tak zawk a nih thu a sawi a. Ram leh hnam humhalhna tha ber chu mahni intodelh a nih angin, YMA member-te chu mahni intodelh tura ke pen zel turin a chah.
Inkhawm hi Nghalchawm branch YMA President Malsawmsanga’n a kaihruai a, he hunah hian zirlai tithate an chawimawi a ni.