Aizawl: Central YMA President Lalhmachhuana chuan nimin khan YMA Day vawi 91-na pualin thuchah siamin, Young Mizo Association (YMA) hi NGO a ni mai lo a, hnam innghahna lungphum, Mizote min phuar khawmtu leh a tul anga ram leh hnam tana ke pen thin a nih thu a sawi.
CYMA president chuan YMA chuan a din tirh, kum 1935 atanga vawiin thlengin Zofate tan thil tha tam tak a ti tawh tih a sawi a. YMA dinna leh innghahna, ‘Tanpui ngaite tanpui’ kawngah ke an pen zel tih sawiin Central YMA chuan kumin YMA Day pualin home, damdawi in leh Mizoram pawna Mizo welfare tan an luang chhuak tih a sawi.
YMA hi thleibik nei lo pawl, a te ber atanga a lian ber thlenga hrut-rualtu pawl a ni tih sawiin Lalhmachhuana chuan, “Rikrum leh chhiat tawh thilah YMA hi auh hmasak ber a ni thin a. Sual do tur pawhin YMA-in ke a pen thin a, mipuite thlamuantu pawl a ni,” tiin, Mizoten YMA an nei chu an vanneih pui thu leh hnamdangin an awt hle tih a sawi a. Tunlai thangthar zingah YMA hlutna hrefiah zo lo awm palh thei a ni tih sawiin, a tul ang zel a inhrilhfiah a pawimawh tih a sawi bawk.
YMA chuan ramngaw leh nungcha humhalh kawngah te, faina leh ruihhlo do kawnga a hmalakna avangin hriat a hlawh tawh hle tih sawiin lawmawm a tih thu a sawi a. YMA Day denchhen hian thisen pek, ei leh bara luan chhuah leh mi dangte tana thil tha tihna nia hmang turin mipuite a chah bawk.
Central YMA president-in a sawi danin, tun dinhmunah YMA member nuai nga an tling tawh a, Group YMA 50, sub headquarters pariat leh branch 821 a awm tawh a ni.