Inrinni khan YMA Day vawi 51-na chu Mizoram chhung hmun hrang hranga lawm a ni a. YMA Branch tam zawkin mi dang tanpui nan leh khawtlang tana hna tlangin hun an hmang.
YMA Day pual hian branch eng emaw zatin nilenga hun hmangin, veng chhung tifaia hnatlang te leh intihhlimna hunte an hmang a. Branch thenkhatin zan lam chauha hun hmangin an veng chhunga mi hmingtha leh zirlai hlawhtlingte an chawimawi a. Branch eng emaw zatin YMA thuvawn, ‘tanpui ngaite tanpuitu’ tih changchawiin veng chhunga khawsak harsa leh mi harsa zawkte an tanpui bawk.
Central YMA hruaitute pawhin YMA Day hi hmun hrang hrangah an hmanpui a. President Lalhmachhuana chuan Kawlkulh North, ITI Veng leh Chaltlang Lily veng-ah hun a hmanpui a. Vice President Lalnuntluanga chuan New Capital a branch a hmanpui a, vawiin hian Tuikhuahtlang branch te hun a hmanpui leh dawn a. General Secretary Malsawmliana chuan Hortoki Jt YMA leh Vaivakawn branch te a hmanpui a. Asssistant Secretary Fabian Lalfakawma’n Saipum leh Chawlhhmun branch a hmanpui a, Treasurer Roneihthanga’n Nursery Veng branch hmanpuiin, vawiin hian Chhawrtui branch a hmanpui leh dawn a. Finance Secretary M.S. Ralte in vawiin hian Samlukhai branch a hmanpui dawn bakah, June 20 khian Upper Republic branch a hmanpui dawn bawk a ni.