Snoop Dogg leh a nupui Shante Broadus te chuan an inneih kum 28-na chu am takin an hmang dun.
Rapper leh a nupui, kum 53 mi ve vete hi June 14 kha an inneih kum 28-na niin, Snoop Dogg chuan an nupa thlalak hlui leh thar hrang hrang a post nasa hle a, an inhualtirh lam atanga an vawiin hun thlengin thlalak hrang hrang hmuh tur a tam hle.
A nupui Broadus pawhin a pasal chu duhsakna hlan bawkin, a thiltihsak zawng zawngah lawmthu a sawi bawk.
Snoop leh Broadus te hi an tleirawl chhuah hlim atanga inzui niin, an pahnih hian California-a Long Beach Polytechnic High School-ah an kaldun thin a, heta tanga innel zui chho hi an ni.
Kum 1997 June thla khan Marina Del Rey, California-a Ritz Carlton Hotel-ah inneiin, kum 2004 khan an inthen veleh zuai a, a hnu kum lina kum 2008 khan an innei tha leh a ni.
An pahnih hian fa pathum – fapa Corde leh Cordell bakah fanu Cori an nei a, Snoop hian Laurie Helmond nen an inneih zuai laiin fapa Julian a nei hman bawk.
An inneih champha puala thlalak leh thu mawi tak tak a post zingah Snoop Dogg chuan, ‘Nu ropui leh min hrethiamtu tak ka nei a, chuti ni lose hetiang hi kan thleng lo ang. Kum tam tak chhung ka thiltih leh ka awm dan hre turin ka bulah a lo khawsa tawh a, min hrechiangtu tak a ni,’ tiin a nupui chu a fak nasa hle.