Russian-te puia Ukraine indonaa kal North Korean sipai 6,000 chuang thi an awm niin British Defence intelligence chuan a sawi a. Hengte hi Kursk region, Russia-a sipai an dah 11,000 zahve aia tam a ni tih an sawi bawk.
UK Ministry of Defence chuan Pathianni khan X-ah, “Democratic People’s Republic of Korea (DPRK) sipaite hi Russia-a Kursk-ah Ukrainian sipaite nen an inbeihnaah an inhloh nasa hle a, 6,000 chuang thi an awm,” a ti.
“June 4, 2025 khan Russian Security Council Secretary leh defence minister thin, Sergei Shoigu-a chuan DPRK tlawhin an hruaitu Kim Jong Un-a nen an inkawm a, hei hi thla thum pawh tling lova a vawi hnih zinna a ni a. Shoigu-a hian DPRK dawrtu ber nia hriat a ni a, Russia-in Ukraine a rûn meka anmahni puihna tur sawitu pawh a ni,” an ti.
“DPRK hi Kursk region-ah an awm deuh ber a. Ukrainian ram china Russian sipai thlawpa an awm hi Russian President Vladimir Putin leh Kim Jong Un-a tan ram dang ngaihdan turah a him lo. North Korea-in sipai a tirh zinga 50% aia tam mah thi an awm a ni,” an ti.
Kar hmasa tir lamah khan North Korean hruaitu, Kim-a hian President Putin-a hnenah an ram chu Moscow thlawptu a ni zel dawn tih a sawi niin an sorkar chanchinbuin a tar lang.
Russia-in an indan ni an lawmna, Russian Day puala thu a thawnah Kim-a hian Putin-a hi ‘dearest comrade’ tia kovin ‘ram inkawmngeih leh inunau tak’ tiin an inkar a sawi bawk.