Mizoramah chuan kan tlawmngai pawl lian ber chu YMA hi a ni a, khawtin deuh thawah branch awmin, chhiatni leh thatniah kan hnam hmel lanna pawimawh tak a ni.
YMA din dan leh a din hunte, hma a lak tawh dan zawng zawngte hretu vek kan ni a, sawi thar kher a tul awm lo e. Chutihrual-erawh chuan member te hian YMA thiltum leh hmalakna hrang hrangte hi kan bosal chho zel ang tih a hlauhawm hle.
Khawpuiah phei chuan tlawmngaia thlan lai peih kan tlem tial tial a, khawhar in a tlaivar tur kan inhmu tlem tial tial ta bawk. A lansarh hun leh a mawi chinah chuan kan buk hluai a, mah se a hnu lam thlenga a hnukhawi tur erawh kan inhmu lo telh telh ni hian a hriat thin.
Tlawmngaihna leh aia upa zahna tha tak mai kan neihte hi bo mai atan chuan a uihawm hle a, thalai zawkte hi kan inzirtir thar a ngai hle. Naupang zawkte hi an zirlai atang hian tuh thei ila, kan hnam nundan mawi takte hi chhawm nung zel turin tan i la teh ang u.
YMA member te hian kristian nun dan tha kan ngaisang lo telh telh nite a hriat thin a, inenfiah kan va ngai nasa em. Kristian tih atana mawi lo ti duh member te hi kan tam hle awm asin!
YMA day kan hmang zo chiah a, a ni a tawp mai lo hian harh thar zui nan hmang ila, hnam lungrual leh inkawmngeih ni chungin tlawmngaihna i chhem nung zel ang u.