Aizawl: Sorkar flagship programme bana kaih scheme kaltlanga ran vulh lama hma lak tumte tan insurance kalpui dan tur relin nimin khan Mizoram State Policy Coordination Committee Vice Chairman KC Lalmalsawmzauva hovin an thukhawm.
Planning & Programme Implementation Committe room-a ‘Livestock Insurance for Progress Partner under Animal Husbandry & Veterinary Department’ rela thutkhawmah KC Lalmalsawmzauva chuan, ran vulh lama hma la tur ten ran hri hrang hrang laka an rante an himna tura fimkhur zirtir a pawimawh thu a sawi a. Chutihrual chuan, ran vulhtuten thlamuang taka hma an lak theih nan ran insurance tha taka kalpui a tul thu sawiin, chumi tihlawhtling tur chuan kalkhawmte thahnemngaihna a pawimawh thu a sawi.
Thutkhawmnaah hian Insurance company tam zawk tan chuan ran insurance chu thil thar a nih thu leh company eng emaw zah chuan insurance pe tur chuan bank inthlunzawm pui an neih a tul thu an sawi a. SBI General Insurance hnuaiah ran insurance kalpui turin hmalakna kalpui mek a nih thu sawi niin, AH&Vety department thawktute nen thawh ho a tul tur thu sawi a ni bawk.
National Insurance Company Limited (NICL)-a thawktute tarlan danin, Mizoramah May 24, 2022 khan MzSRLM leh AH&Vety dept nen insurance kalpui turin inremna thuthlung a lo siam tawh a. Kum thum chhungin ran insurance-na sum Rs nuai 67.8 a lo pe chhuak tawh a ni.
Bana Kaih Scheme kaltlanga AH&Vety department hnuaiah hmalak tum, mi mal dilna 3,641 a awm a. Chung zinga 2,170 chu vawk vulh tum an ni a, 908 chu ar vulh tum an ni a, 269 chu bawng vulh tum an ni a, 201 chu kel vulh tum an ni.