Aizawl: MNF Vice President Lalchhandama Ralte chuan ZPM sorkar chu sum pawh luh la nei lovah puhin, GST lakkhawm a chhiat chhan leh fiscal dificit a san chhan chu sum enkawl an thiam loh vang a nih loh chuan chhan dan puh tur a vân thu a sawi.
Thawhtannia Mizo Hnam Run chhung inkhawm hun hnihnaah MNF Vice President Lalchhandama chuan thu sawiin, kum khat leh a chanve an kal hnuah ZPM sorkar chu tha bik, fel bik, financial management thiam bik nia insawite hian Delhi tlangah project um chhuah hlawhtling an neih a la hriat loh thu a sawiin, “Share of taxes, puk chawp, CSS pangngai lo kal bak manage tur an la nei lo. SASCI sum an ti-lapse a, heti chungin finance minister-in balance cheng vbc sang chuang nei anga a sawite hi a mak,” a ti.
GST collection chungchangah ZPM sorkar performance a chhiat thu sawiin Lalchhandama Ralte chuan, “Nikum nen khaikhinin state sum hmuhna pawimawh tak GST-ah kuminah Jan-May chhung minus hlirin an kal a. |henawm ram buai Manipur pawh May 2025 khan 102% GST collection an nei theih laiin, Mizoram chu -26% a ni. Nikum (2024-25) kan phak loh em em lai hian, nikum vek khan Mizoram chu India ram pum GST Colletion-ah bottom 5-ah kan awm. Bottom 5-a lang vete hi UT vek an ni nghe nghe,” tiin, mithiam zawkte chuan GST collection a hniam chhan hi hmasawnna hnathawh a tlem vang leh central ministry hnuaia project works hai luh a tlem vang nia an sawi thu a sawi.
Leader of Opposition Lalchhandama Ralte chuan, sum pawh luh an nei lo a, sum che vel tur a awm lo tiin, “Sorkar kum liamtaah khan fiscal deficit a nasa hle. Tunah hian Rs vbc 3000 vel an puk tawh niin an sawi a. Sum indaih lohna hi kum 2024-25 Budget (RE) kan en chuan GSDP atangin fiscal deficit chu 7.64% chuang a ni a. Hei hi Covid-19 hnu lamah a sang hle. FC 15-na leh The Mizoram FRBM (Amendment) Act, 2020 chuan Fiscal Deficit % of GSDP hi ‘3% target’ tur a tih laiin, sorkar kum kal meka fiscal deficit target an dah pawh 4.58% a ni,” tiin, GST collection a chhiat chhan leh Fiscal Deficit a san viau chhan hi financial management an thiam loh vang a nih loh chuan a chhan dang puh tur a van thu a sawi.