National Health Mission hnuaia Reproductive & Child Health (RCH) Programme hmalakna in kawthalo dona beihpui thlakna chu Health Minister Lalrinpuii’n nimin khan a hawng.
Thla hnih chhung kalpui tur ‘STOP Diarrhoea Campaign’ hi tun tumah hian thupui atan ‘Kawthalo ven nan faina leh ORS a pawimawh’ tih hman a ni.
Hawnna inkhawm kaihruaitu Dr. Lily Chhakchhuak, Mission Director, NHM chuan ‘STOP Diarrhoea Campaign’ kalpui a nih dante sawi fiahin, He campaign hi India ram hmun hrang hranga hman a nih rualin Mizoramah pawh hman tawh thin a nih thu a sawi a. Kumin pawh June 16-July 31, 2025 chhunga hman leh tur niin, a hawnna hi Aizawl leh dstrict tinah a rual a neih anih thu a sawi.
Health minister chuan India ram pum huapin naupang thihna zaa 4.8 hi kawthalo vang a ni a. He dinhmun hi Mizoram dinhmun ni chiah lo mah se, kawthalo hi naupang natna tlanglawn tak, enkawl vat loh chuan thihpui theih natna a nih thu a sawi.
STOP Diarrhoea Campaign chhung hian naupang kawthalo enkawl nana tha ber ‘ORS leh Zinc’ thatna nasa lehzuala inzirtirna pek te, Health & Wellness Officer, Health Worker, Anganwadi Worker leh ASHA ten anmahni bial chhungah naupang kum nga hnuai lamte chenna inah kalin ORS leh Zinc tablet an sem dawn bakah, sorkar damdawi in, Subcentre leh Anganwadi Centre-ah te ORS-Zinc corner siam a ni a nih tur thu leh, ORS siam dante, faina chungchangte inzirtirna neih a nih tur thu a sawi.
He campaign hi health department mai bakah, School Education dept., Women & Child Development dept, Rural Development dept, Public Health Engineering dept, Urban Development & Alleviation Development dept leh Aizawl Municipal Corporation (AMC) te nen an thawk ho dawn a ni.