Israel-Iran indonain a ni lina a kai mek laiin Thawhtanni zan khan Iran-a India khua leh tui awmte thiar chhuah hna tan a ni a. Sorkar chuan a thawh khat nan Indian 110 chu Armenia ramri kânpui niin Nilaini hian Delhi panpui an ni dawn tih a sawi.
Iran-ah hian Indian zirlai 10,000 vel an awm mek a, New Delhi chuan Tehran hnenah hian a mite himna tur leh an ram an chhuahsan theihna kawng dappui turin a ngen a, Israel-in nasa taka an khawpui liante a beih chhunzawm reng laiin ruahmanna siam a ni ta a ni.
India-in a ngenna hi Iran chuan chhangin an chung boruakte chu indona kal mek avangin an khar rih tih a hrilh a. Hei vang hian zirlai tangkhangte chu khawmuala inrina kânin Azarbaijaan, Turkmenistan leh Afghanistan-ah an luh a ngai dawn tih a hrilh a ni.
Iran-a Indian Embassy chuan Pathianni khan kaihhruaina tichhuakin Indian leh Indian thlahte chu an bepawh reng a, tul lova chhuak vak lo tura chahin embassy-in an social media-a dinhmun thar a tar lan thinte chu ngaichang zel turin a ti.
Tehran-a Indian Embassy hian himna dinhmun chu a thlithlai reng a, zirlaite pawh an himna atan a bepawp reng tih a puang bawk.
Israel-a Indian Embassy pawhin Inrinni atang khan emergency helpline siamin Indian-te chu buaina awm mekah inralringa ngaihven tha turin a ti a. Boruak an thlithlai reng thu an tar lang bawk.
Zirtawpni tuk atanga Israel-in Iran a beihnaah hian an inchhang let tawn zel a. Tel Aviv hian khawpui lian leh pawimawh deuhte a bitum deuh va, thi leh hliam leh thil chhia pawh a tam tawh hle.