National Health Mission (NHM) chuan thawhtanni khan Kawthalo dona beihpui thlak tanin, health minister in a hawng a, tun tuma an thupui chu ‘Kawthalo ven nan faina leh ORS a pawimawh’ tih a ni.
Khaw awm dan inthlakthleng leh kan ruahtui thianghlim tawk loh avangtein kawthalo hi a awm nasa nia ngaih a ni thin a, kumtin a nawlpuiin fur khuaah hian kan tawng nasa emawni chu aw a tih theih.
Tun tuma dona beihpui thlak hi thla hnih chhung awh tur a ni a, hemi chhung hian mipui lam pawhin department te thawhpui thiam ila, kan taksa hrisel nan leh kawthalo laka kan him nan mithiamten tih tur leh dan zawm tur an siamte i ngaipawimawh thar teh ang u.
Khum beta natna ni chiah si lo, taksa nghawng na ve tak leh nunram tichau ve rawih thei he natna hi mitinin kan tawrh theih vek a ni a, naupang leh puitling thlenga kai theih natna a nih avangin ei leh ina kan fimkhur a, ORS lam chi kan in tam pawh a tul awm e.
NHM lam hian thawhpui hrang hrang neiin, anni ho nen chuan hma an la chho dawn a ni a, mipui lam pawhin kan theihtawpa kan lo tawiawm a, kan lo thawhpui thiam a tul hle.
Mi thiam zawkte sawi pawm thiam ila, mahnia damdawi in chawh ve ngawt mai lovin, an zirtirna leh inenkawlna tur an sawi leh ziahte zawm ila, hnam hrisel nih i tum chho ngei teh ang u.