Aizawl: Horticulture Minister C Lalsawivunga’n Mizoramin hma a sawn hle tawh chungin state budget-ah thlai tharchhuah budget a la nei ve lo hian thar chhuah a la neih tlemzia a tilang nia a hriat thu a sawi.
Horticulture department buatsaih Horticulture Fair 2025 chu nimin khan Horticulture Minister C Lalsawivunga’n RB McCabe Hall, Aijal Club-ah a hawng. He fair hi Aizawl Park a neih tur niin, ni thum chhung awh tur a ni.
Hawnna inkhawmah C Lalsawivunga chuan Mizoramin state a nih atanga vawi tamtak budget a lo pharh ve tawh a, state budget hi an tharchhuah budget an la nei ve lo tih sawiin, “Hma kan sawn hle tawh chung hian, hei hian thar chhuah kan la neih tlem zia a ti langin ka hria a, department a thawk tute leh kuthnathawktute nen kan tang zel ang a, thlai thar chhuah tam lamah tan kan la chho dawn a ni,” a ti.
Horticulture minister chuan, “Mizote hi hna kan thawk nasa em em a, thei leh thlai pawh thar tam mah i la, a hralhna lamah harsatna kan tawk leh thin. Hei hian thlai chingtu tamtak te rilru a ti hnual a, chumi tihzia awmna turin Assembly House ah pawh thei leh thlai thenkhat te siam dan danglam deuha tih ral dan kan pass a nih kha,” a ti bawk.
He hunah hian district 11 atangin Best Farmer Award mi 11 hnenah hlan anni. Kumin Fair-ah hian Best For Farming Horticulture District thlan thar a ni a, Saitual leh Champhai District ten lawmman pakhatna an la ve ve bawk.
Kumin hian stall, Pangpar – 128, Thei tiak – 60, Leitha, Tools & Implements – 11, Pot – 6, a vaiin stall 205 an inpho a ni.
Horti dept. hotute sawi danin, Covid-19 hrileng avanga kum 2020 leh 2021 tih lohah, kum 2012 atangin Horticulture Fair hi kum tin neih a nih thu a sawi a. Hemi hun chhung hian stall neituten an hralh chhuah tawh zat chu Rs 346,30,607 a tling.