Aizawl: Sakawrdaia YMA Inkhawmpui Lian Vawi 75-na thlenna tur pandal sak hna chu nimin khan tan a ni.
October 2025-a YMA Inkhawmpui Lian thlenna tur khua Sakawrdai YMA chuan pandal sak tan hnatlang a ko a. Pandal sak hna hi a nawlpuia thawh theih a la ni lo a, a ruh relpui tun chauh a nih avangin mi 50 vel an thawk a ni. Pandal sa thiam mi pathum rawih a ni a, an kaihhruaina hnuaiah hna thawh a ni a. June thla chhung hian a ruh relpui hi zawh hman an inbeisei a ni.
A ruh relpui siam zawh a nih hunah hnatlangpui koh tum a ni a, pandal sak hna hi tluang taka thawh theih a nih chuan September thla ral hmaa sak zawh hman an inbeisei bawk.
Pandal sak hna tan ni hian Upa Hrangzika, kum 96 chu a thawk chhuak a, ani hi hnatlang zinga upa ber a ni.
Bialtu MLA Lalchhandama Ralte leh N. Khawdungsei VCP Lalthanliana pawhin hnatlang thingpui inna tur a pe bawk a, Inkhawmpui Lian Organising Committee chuan an chungah hian lawmthu a sawi.