Special Judge (Prevention of Corruption) hmaah nimin khan Lawngtlai West bialtu MLA C Ngunlianchunga a inlan a, bail a dilna pawmsak a ni.
Congress MLA C Ngunlianchunga hi koh a nih angin Special Judge (Prevention of Corruption) F Rohlupuia hmaah a inlan a, court-in jail tan ngaihna a hmuh loh avangte, tlanbo hlauhawm a nih loh avang leh hriselna lamah harsatna a neih avangin bail a dilna hi pawmsak a nih thu, thudawnna chuan a sawi.
Congress MLA hi July 22, 2025-ah court-a inlan leh tura tih a ni.
The Zozam Times zawhna chhangin C Ngunlianchunga chuan, “Vawiinah (nimin) chargesheet min pe ta kha a nia, case ka neih ve takah chuan bail-te ka dil ta a, min phalsak ve ta mai kha a nia. Court-ah a awm vek tawh a, court-in a ngaihtuah anga, a la rel fel mai turah ka ngai,” a ti.
“Keimahah chuan engmah dik loh leh tihsual ka neih ka hre lo, a tira ka dinnaah ka la ding reng. Chargesheet te kan han chhiar anga, min puhnate pawh court-ah ukil-ten an la sawi ang chu. A hma khan criminal case ka nei lo hrim hrim a, min hrilh lo bawk a. Ka hun lai a ni lo va, ka awm tawh loh hnu a nih avangin, engmah ka hre lo tih kha ka chhanna a ni. Chuti chung chuan case min siamsak ta kha a ni,” a ti bawk.
Tar lan tawh angin, March 10, 2025 khan Chief minister Lalduhoma’n Assembly House-a Lalmuanpuia Punte zawhna LADC CEM tura ruat V. Zirsanga case chungchang a chhannah C. Ngunlianchunga, MLA pawh case nei lai a nih thu a sawichhuak a, Congress MLA hian case a neih thu a hriat loh thu a sawi ve thung a. CM-in a sawi hnuah a hre chauh tih chu, hemi ni veka Aizawl Press Club-a thu thar thehdarhtute a kawmnaah a sawi a, he case hi corruption case a nih thu leh a fihlim thu a sawi bawk.
Aizawl Press Club-a thu thar thehdarhtute a kawmnaah C Ngunlianchunga chuan, case a neihna Lawngtlai Bypass road, Thingkah atanga kawng siamna tura CEM a nih laia, kum 2013-ah Non Lapsable Central Pool of Resources (NLCPR) atanga an sum hmuh Rs vbc 4.7 tihchingpen chungchang a nih thu a sawi a. Minister a nih tak avangin CEM atangin a ban hnuah engmah a hriatpui zui loh thu a sawi.
CM-in anticipatory bail la tura a rawn chu lak a tum loh thu a sawi a, jail tan mai ni lo, a tul chuan ram tan chuan thih pawh a huam thu leh sum tihchingpen chungchangah a fihlim thu leh sum thianghlimlo cheng khat mah a lak loh thu a lo sawi tawh a ni.