Aizawl: MZP Headquarters, Serchhip-in HSLC, HSSLC leh MPSC exam-a tithate lawmpuina an buatsaih chu Chief Minister Lalduhoma’n khuallian niin nimin khan a hmanpui.
Serchhip Bawrhsap Pisapui Conference Hall-a hun buatsaihah chief minister Lalduhoma chuan, kuminah Serchhip-in HSLC topper an nei a, distinction-a pass eng emaw zat an nei a. HSSLC-ah an naupang ten an titha viau a, zaa za pass school panga an nei a. MPSC topper leh MPS pakhat leh MIS pakhat an nei tih sawiin, kumin hi Serchhip tan zirna lamah kum tha nia a hriat thu a sawi.
Hman ni lawkah Mizoram chu Fully Literate State-ah an puang tih sawiin Serchhip bialtu MLA ni bawk Lalduhoma chuan, “Hun rei tak atang tawhin Serchhip district chu India rama district level-a literacy sang ber kan ni thin. Zirna kan uar a, lehkhathiam tam tak neih hi kan inhmeh a ni,” a ti.
Chief Minister hian, human resource development lama sorkarin hma a la nasa tih sawiin, “Mizo thalaite hi a theiin sorkar hna thawk se, a theiin company-ah hna thawk se, a thei chuan ram pawnah hna thawk se, a titheiin sumdawnna leh thilsiamna te din se, mahni zawnah theuh ram leh hnam tana thawk chhuaktu ni vek thei se tih chu kan hmathlir a ni,” a ti bawk.
Inkhawm hi MZP Hq. Serchhip Vice President Lalhlimpuia’n a kaihruai a. Serchhip Bawrhsap Paul L. Khuma, MZP Gen. Hq. President H. Lalthianghlima leh Darchhuana, President, Hq. Serchhip te pawhin thu an sawi a ni.