Serchhip mipuiin khawtlang tana hnawksak leh tha lo an hmuhte awlsam taka a thlalak nena an report zung zungna tur Vantlang Viltu moble application chu nimin khan Chief Minister Lalduhoma’n a tlangzarh.
Serchhip DC Office buatsaih Vantlang Viltu Mobile Application tlangzarh inkhawmah hian Chief Minister chuan, mipuite leh sorkar inlaichinna tipungtu tur, thawhhona tithatu tur, chawpchilh taka mipuite mamawh tihhlawhtlinna, harsatna tawk te tanpuina ni nghal bawk – Vantlang Viltu Application, Serchhipin an nei chu lawmawm a tih thu a sawi a. Hetiang ngaihtuah chhuaktu an DC leh a thawhpuite chungah lawmthu a sawi.
Chief minister chuan mipuiin tangkai taka hman an tum ang a, mipuite harsatna rawn sawi apiangte chu a mawhphurtuten tha takin an lo bawhzui thin turin a chah a. Sorkar langtlang leh huapzo an kalpui zelna lamah he application hian a tanpui thei dawn a. District dangah pawh kalpui thei se a duh thu a sawi bawk.
He Application kaltlang hian mipuiin dan phal lohva tuichhe paih, kawngpui tihnawk, bawlhhlawh paih leh halral, damdawi rui leh hralh, kangmei chhuak, vanduaina, transformer chhia leh electric kaihhnawih harsatna, traffic rules bawhchhia, tui connection lama harsatna ang chi te, mipuiin ni tin nuna harsatna an tawh sorkarin a hriat vat ngai chi zawng zawng te pawh an hrilh zung zungna tur a ni.