Tennis huanga inelna ngaihhlut leh lar ber pawl, Wimbledon chu Thawhtanni atang hian khelh tan leh a ni dawn a, kum 2025 inelnaah hian lawmman an tipung nasa hle a, a punna hi nikum aiin 7% zetin a sang.
All England Lawn Tennis Club (AELTC) chuan Wimbledon 2025 lawmman zawng zawng chu £ maktaduai 53.5 (Rs. vaibelchhe 610) ni turin thutlukna an siam a. Kum 2024-a lawmman an sem chhuah aiin 7% in a sang tawh a, kumin 2015-a lawmman an sem chhuah nena khaikhin phei chuan a let thawkin a sang tawh zawk a ni.
Mipa maltan champion leh hmeichhe maltan champion-te chuan £ maktaduai thum (Rs. vaibelchhe 34 ) ve ve an dawng ang a, hei hi nikuma lawmman an pek aiin 11.1% velin a sang zawk a, Grand Slam inelnaa lawmmanah chuan a sang ber a ni ang.
Maltan bika first round paltlang zo ta lo pawhin £66,000 (Rs. nuai 75) zel an dawng dawn a, hei pawh hi a hma aiin 10%-in a pung bawk a ni.
Doubles, mixed doubles leh wheelchair nena inkhelte lawmman tur pawh an tipung vek a. Doubles lawmman hi 4.4%-in a pung a, mixed doubles lawmman pawh 4.3%-in a pung a, wheelchair hmangte lawmman phei chu 5.6% ngawtin a pung bawk.
Kumina heti taka lawmman an tihpun chhan chu player lar tam tak, khawvel pum huapa Top 20 huanga awm tam takte chuan Grand Slam lawmman tihpun an rawt nasat vang a ni.
AELTC Chairman Deborah Jevans chuan, “Player-te thu leh hla kan ngaithla a, kan inkungkaihna a tha a, hetiang thutlukna hi kan siam ta a ni,” a ti.
Wimbledon mipa maltan final leh hmeichhe maltan final khelh hun pawh an thlak danglam a, a hmaa an khelh hun aiin darkar hnihin an khel tlai tawh dawn a, India sanaa zan dar 8:30-ah an khel dawn a. Double final pawh India sanaa tlai dar 5:30-ah an khel ang.