Aizawl: Land Revenue & Settlement department-in district thar pathumte an huam chhung khuaa ram chhinchhiahnate (land record) leh guard file te chu district bawrhsap pisa theuhah nimin khan a hlan.
Saitual district chhunga ram chhinchhiahnate hi Aizawla Revenue Directorate leh Champhai SO pisa atangin hlan niin, Khawzawl district pawh Champhai SO pisa atangin thawn a ni a. Hnahthial district amite hi Lunglei district atanga hlan a ni bawk.
LR&S Minister B.Lalchhanzova chuan, district tharah mipuiin Revenue department an mamawh a sanzia hriain, heng district pathumah te hian hna thawk thei tak tak tura thuam an tumna kal zel anih thu a sawi a. Ram chhinchhiahna inhlan phawt loh chuan mipui tan dawr theih annih loh thu sawiin, district hlui lamah thliar fel hna hautak zet mai chu thawktute inpekna zarah tihfel a ni ta chu lawmawm a tih thu a sawi.
Minister chuan Revenue department hi India ram state dangah chuan DC enkawlna hnuaia awm a ni a, chu chu an chakna hnar pawh anih thu sawiin, hei hi Mizoramah pawh kalpui tan mek a nih thu a sawi.
B. Chhanzova chuan thawktu lam pawh district thar lamah dah belh zel annih thu sawiin, a bultan nan tunah a telloa awm theih loh thawktute tlem azawng, hna thiam te dah an nih thu a sawi a. Chief Minsiter Lalduhoma’n Revenue Department-a thawktu an indaihloh dan hriain, post hnawh khah an dil te chu eng emaw zat phalsak an nih tawh thu a sawi bawk.