Mizoram sorkar chuan Mizoram Universal Health Care Scheme (MUHCS) chungchangah phai lam hospital leh Mizoram private hospital-te hi rate chungchangahte khaikhin chi a ni lo chungin sorkarin duat taka phai lam hospital-te nen rate inang tlang a offer tih a sawi.
Mizoram sorkar chuan nimin khan thuchhuah siamin private hospital intelkhawm pawl, Non Government Hospital Association (NGHAM)-in June 17, 2025-a MUHCS kalpui meka an dinhmun an tar lanah cashless avanga ni tin sum lut awm lo tura an ngai chu sorkar lam chuan Rs nuai 50 pek lawk a inhuam reng bakah chawlhkar tin damdawi in bill hi pek thin a nih avangin an buai lo turah a ngaih thu a sawi.
MUHCS rate hi 50%-80% vela hniam zawk anga sawi chu hriatchian loh vang nia a lan thu sawiin, Aizawl chhunga private damdawi in lian atanga Mizoram State Health Care Society-in kum hmasa lama claim a dawn atanga chhutin, rilphir zai (appendicectomy) senso chu chawhrualin Rs.36,250 (room luah man telin) a ni a. MUHCS hnuaiah hian rilphir zai hi base rate Rs 25,000 tih ni mah se, heng damdawi in lianah hian additional incentive an dawn tur zat nena belhkhawmin rilphir zai package rate hi Rs 32,500 atanga Rs.35,000 thleng a ni thei a. Damlo chu a entitlement a zirin cabin-ah emaw, semi-cabin-ah a awm a nih chuan room man hi he package rate tar lan piah lamah hian damdawi inten an bill belh thei bawk a. Chuti chuan room luah man nen chuan Rs 36,250 ai hian a sang zawk dawn tih a sawi.
“Phai lam hospital leh Mizoram private hospital-te hi rate chungchangah te, quality chungchangahte, grading chungchangahte khaikhin chi a ni lo va. Chuti chung chuan sorkar chuan Mizoram private hospital-te chu duat takin phai lam hospital-te nen rate inang tlang a offer bakah, hemi piah lamah pawh hian sawipui a la inhuam cheu a ni,” a ti.
Phai lam non-empanelled hospital te, reimbursement phalsak anga sawi hi a dik ziktluak lo a nih thu sawi bawkin, “MUCHS guidelines 3.12.2/10.3.2 ang chuan emergency-ah emaw, empanelled hospital-ten an enkawl theih loh natna bikah chuan phai emaw, Mizoram chhung pawh ni se, non-empanelled hospital-ah chuan reimbursement theih reng a ni,” a ti bawk.
Mipui nawlpui, a bikin mi harsa zawkte leh sorkar hnathawk tam takte chuan damloh nikhuaa inkhulh chhuahna tur sum an neih loh dan te, puk chawpa inkhul chhuak te leh, mahni in leh lo hial tihral ngai khawpa mangangte an awm thin tih a hriatpui avangin sorkar chuan cashless-in Mipui Healthcare hi a kalpui mek a. Hei hi sorkar chuan mipui tan tha a ti hle tih a sawi.
Sorkar chuan mipuite hmakhua ngaiin private hospital-te nen inrawn tlanga dawhkan khat kilhoa inbiakremna kawng zawn zel hi a duh dan a nih thu a sawi bawk.