Kan ramah ngei pawh sorkar in electric bill lak dan an han siksawi chho a, a leh li-a pung ta hluaite an awm chhoh lai hian kan milar thenkhatte chungah pawh a lo thleng ve tawh tho a lo ni.
Bollywood star lar chak tak Taapsee Pannu tan pawh thawkkhat lai kha chuan awm hle hle theih a ni bik lo. Nuih tur nge tah tur tih thlenga a ngaihtuah buai a ngai a. A electric bill lo thleng punna chu 835% a ni chheu mai! Thla khat bill chauh a ni zui.
Khatia lockdown vang lai hnu lam, unlock kalpui chhoh hret hret a nih lai khan film industry leh Mumbai-a chengte mai ni lo, ramchhung hmun hrang hrangah electric bill maksak leh dangdai tak tak thleng hriattur a tam em em a, an phun chuah chuah mai a nih kha. Ani pawh hian X (khatih laia twitter) kaltlangin bill thlalak leh power company-ah chhanletna a ziak hial.
Awihawm loh khawpa tam bill lo kal chungchangah zawhna a zawh rualin, heti taka power chawi tura beisei a nihnaah a lungawi lohna a hrithla. Taapsee hian June thla bill lo kal hi Rs 36,000 a nih laiin, May thla khan Rs 3,850 a chawi a ti a, thlakhat chhungin a let kua zetin a pung. A luah miah loh apartment building pakhat atanga a chawi tur hi a hrethiam thei hlawl lo a ni.
A sawi zelnaah April leh March-ah Rs 4390 leh Rs 570 a chawi a, tumahin an luah lohna apartment-ah April leh May khan Rs 730 leh Rs 8640 a chawi lawih tawh bawk a, mak a ti. Engtikawng mahin a hrethiam thei lo. A ngawi hek lo.
“Lut ru emaw lo cheng ru an awm emaw ni le.. heti zat zat min chawitir an tum hi a mak. Tumah kan cheng pawh a ni si lova, karkhatah vawi khat vel hi tifai turin ka kal a ni mai a. Mahse, kan chenna (apartment) ah hian khawsa an lo awm ru reng emaw ni, ngaih a tha lova, kan hlauthawng ru angreng khawp mai. Thil nihna dik tak hailan a nih theih nan tanpui kan ngai ang,” tiin a sawi.
Hetih lai hian, fan te chuan a harsatna leh manganna tawh hi fiamthu leh nuihzatthlak lamah lo laksakin, “Thil dang vang a ni love, film i channa atanga i hlawhchhuah zat atang khan chhutsak che in an chawitir che a ni ang,” tih te a awm. A thlavang hauh a, na tak taka tawng pawh an tam viau bawk.