Liverpool chuan Bayer Leverkusen atangin Germany attacking midfielder kum 22 mi, Florian Wirtz an la lut ta a, an leina zat hi £ maktaduai 116 ($ maktaduai 156.27) niin an sawi a. A tirah £ maktaduai 100 an pe phawt ang a, a hnuah £ maktaduai 16 an pek belh leh dawn niin an sawi.
Wirtz hian Anfield-ah kum nga chhung atan contract a ziak a, a jersey number tur an la tichiang rih lo a, nakin deuha puanzar leh tur a ni ang.
Wirtz chuan, “Ka hmaah chona thar hmachhawn tur a awm dawn a, ka phur tak zet a. Bundesliga chhuahsana huang pawn lama kal duhna a lian a, Premier League boruak chhim ve hi ka chak ber a ni,” a ti.
“Eng ang takin nge Premier League-ah hian ka chet ve theih dawn tih kan la hre chho dawn a, a tha thei ang bera ka khelh theih ngei ka beisei. Ka hmelhriat thenkhat ka zawt a, Premier League chu ka telna tur dik tak a nih thu min hrilh zel a, hei vang hian inkhelh vat vat ka châk phah lehzual a ni,” a ti bawk.
ESPN-in attacking midfielder tha zual 100 an thlan chhuaha pahnihna ni thei, Wirtz hi Bayern Munich leh Manchester City pawhin lak an tum viau a, Liverpool hi a thlang ta a. A chhuahsan tak Bayer, Leverkusen tan khan vawi 197 a khel hman a, goal 57 thunin mi goal thun tur vawi 65 a siamsak hman bawk a ni.