AZL: Mizoramin remna leh muanna a neih champhaphak vawi 39-na, ‘Remna Ni 2025’ chu MZP chuan June 30 (Thawhtanni) hian Lammual-ah lawmna hun a hmang dawn.
Remna Ni 2025 lawmna hi Chief Minister Lalduhoma’n hmanpui tura beisei a ni. He hunah hian sikul hrang hrangin cheraw kanin an entir bakah, zai leh lam, thusawina leh lemchan entir a ni bawk ang. Council of Churches Mizoram General Secretary Rev. Dr. Lalhmangaiha’n hunserh a hmang dawn a ni.
MZP chuan Mizo mipui zawng zawng, sorkar mi pawimawh, NGO leh kohhran hrang hrang, zirna in zawng zawng leh political party tinte he hun hmang tur hian a sawm.
MZP chuan Remna Ni hi Mizo mipuite tana hun pawimawh, lungrual taka lawm ho tur ni mah se; a bik takin political party-te ngaihdan a inang lo fo a. Remna Ni-ah inhnialna a nasa thin hle a. Hun pawh hman ho hleihtheih a nih loh avangin MZP chuan a vei hle a, political party awn lam nei lo zirlai pawl chuan kum 2018 atangin kum tin Remna Ni lawmna a buatsaih ziah tak thu an sawi.