Aizawl: Kum 2024 chhungin Mizoramah Excise & Narcotics Department in ruihhlo, heroin kg 46.68 an man a. Mizoram police-in kg 80.81 an an a, an man zawng zawng bekhlhawm hi kg 127.49 a tling a. Ruihhloa inchiu thin mi 14,000 bawr vel an awm bawk.
He thu hi Excise Minister Lalnghinglova Hmar-in June 21, 2025 zana YMA Tlangnuam Branch-in YMA Day lawmna an buatsaih a hmanpuinaah a sawi.
Excise minister chuan ruihhlo do hna tih takzeta thawh a, ruihhlo ngaite enkawl kawnga hmasawn a tul thu a sawi a. Ruihhlo thahnem tak man ni thin mah se, man loh tam tak an awm thu leh heng ruihhlo a hlawma man hi Mizoram ami tur ni lo vin, a tawlh nan an rawn hman thu leh nasa takain khawchhak atangin a rawn chhukthlak thu a sawi.
Minister chuan Zoram dinhmun a chhiat hle thu sawiin, inchiu thin hi mi 14,000 bawr an awm thu a sawi a. YMA chuan ruihhlo do kawngah bul an tan a ngai a. Ruihhlo ngaite hi an vei a tul tak zet a, an beidawn san mai tur a ni lo tih sawiin, kohhran hrang hrang hruaitute nen theihtawp chhuahin a huhoin camping vawi khat tal an siam a ngaih thu a sawi bawk.
Lalnghinglova Hmar chuan hripui len laia a enkawlna hmun tura sorkar a beidawn tep laiin kohhran a inrawlh a, nasa takin a chhawk a. Chutiang bawkin ruihhlo ngaite chhanchhuah kawngah kohhrante hian tangrualin mawhphurhna la turin a ngen.
YMA Tlangnuam Branch-in Tlangnuam Community Hall-a YMA Day an hmanna hi Branch YMA President T Zorammawia’n a kaihruai a, HSLC leh HSSLC exam a pass tharte lawmpuina thilpek hlanna leh YMA Day puala Essay Inziahsiak lawmmante sem a ni bawk.
- Chawlhkar kal taah pawh la man
Chawlhkar kalta ni hnih chhungin Excise & Narcotics Department chuan Methamphetamine leh Heroin thahnem tak an man.
Ningani tlai khan Phainuam, Saihapui ‘K’ Road, Kolasib district-ah heroin kg 2 & gram 502 (Hawng 220) leh a neitu nia puh mi pahnih – Lalramtiam (30), Tahan ‘F’ group, Myanmar leh Lalremruata (34), Zemabawk, Aizawla khawsa nia inchhalte chu an man a, state pawn lama tihral tum mek lai a ni.
Ningani tlai vek khan 20 Assam Rifles nena thawk dunin Pukpui bul, Lunglei district-ah Methamphetamine Kg 3 & gram 477 (Tablet 36,400) leh a neitu nia puh mi pahnih – Sapna Chakma (40), Tiperaghat II, Lunglei district leh Punyo Sur Chakma (29), Kamalagar II, Lawngtlai district-a khawsa nia inchhalte chu an man a. Methamphetamine mante hi hnam dang hnen atangin an hmuh niin an sawi.
Hemi tlai vek khan Zokhawthar, Champhai district-ah heroin gram 222 & mg 100 leh a neitu nia puh mi pahnih – Zokhumi (65) leh Lalnunsiami (37), Khawmawi, Myanmar-a khawsa ve ve nia inchhalte an man.
END chuan Zirtawpni chhun khan Tuipui, Khawzawl Road-ah Heroin gram 418 & mg 400 (Hawng 43) leh a neitu nia puh – Rebecca Nianglunchingi (28), Champhai Vengthar-a khawsa nia inchhal an man.