Khawvel hmun dang rualin Mizoramah pawh Inrinni khan International Day of Yoga 2025 chu hman a ni a. A hmanna pui ber Rajiv Gandhi Stadium, Mualpui, Aizawlah neih niin, Larsap General Vijay Kumar Singh hovin hman a ni.
He hunah larsap chuan thu sawiin, India ram atanga bultan leh chawilar, yoga-in khawvel pum a dengchhuak leh thleibik nei lova ngainatu an pung zel chu lawmawm a tih thu a sawi a. He ni pual liau liaua kum tina ‘International Day of Yoga’ hman a ni chu India ram tana chhuanawm leh chhinchhiah tlak tak a ni tih a sawi.
Larsap chuan Yoga chu taksa, rilru leh ngaihtuahnate tha taka thlunzawma hriselna tha thlentu a nih thu sawiin, yoga exercise hrang hrangte chuan taksa leh rilru hrisel nan tinzawn leh hnathawh dan bik an neih hran theuh thu a sawi a. Awmze nei taka taksa sawizawi, boruak tha hip luh leh ngaihtuahna sawrbing a, dan dik taka yoga an tih chuan hriselna a thlen rualin, tihdan dik tawk lo erawhin nghawng tha lo a thlen theih avangin yoga ngainatute chu AYUSH hotute leh mithiamte atangin inzir hmasa thin turin a chah a. Mizoram chu boruak thianghlim tamna a nih thu leh hei hian taksa leh rilru hriselna kawngah hlawkna tam tak a thlen thu sawiin, Yoga exercise uar zawka kalpui kawngah pawh tangkaina a neih ngei a beisei thu a sawi bawk.
International Day of Yoga hmannaah India ram puma International Day of Yoga lawmna pui ber, Vishakapatnam, Andra Pradesh-a Prime Minister thusawi ngaihthlaka, thlirho a ni a. Hemi hnu hian Common Yoga Protocol hmangin a huhovin Yoga Instructor-te kaihhruaina hnuaiah yoga exercise chi hrang hrang tih a ni.
Ministry of AYUSH chuan International Day of Yoga 2025 hman dan tur signature event 10 duangin, Mizoramah chuan heng zinga pahnih – Yoga Sangam leh Harit Yoga-te hi tih a ni.
International Day of Yoga pual hian Mizoram district hrang hrang, district hospital, health and wellness centre, zirna in, pawl hrang hrang leh department-ten mahni hmunhma remchangahte hun an hmang a ni.