Aizawl: MPCC General Secretary R Lalrinawma chuan Congress MLA C Ngunlianchunga’n thubuai a neih chungchanga thil tidik lo an awm chuan an phu tawka hrem an nih thuai chu an duh dan a nih thu leh, thu dik hai lan a nih ngei an duh tih a sawi.
Nimina MPCC in Congress Bhanvan-a chhung inkhawm an neihah he thu hi sawiin MLA hlui ni bawk, R Lalrinawma chuan, March 2025-a Assembly budget session lai khan, C. Ngunlianchunga’n ZPM-in LADC-a CEM atana V Zirsanga an thlem luh dan vel te, chief minister Lalduhoma ngei pawhin tawktarh a neih chungchang huaisen takin a sawi chhuak chu chhang ta mai lo chuan, chief minister chuan Lawngtlai Bypass road siam chungchangah thubuai a neih avanga presecution sanction a pek tur thu leh anticipatory bail dil tura tiin mawi lo takin a deusawh tih a sawiin, “Pu Lalduhoma khan anmahni tan chuan a tifuh khawp mai, issue a divert chiang hle a. Eiruk thubuaia Court-in Pu V. Zirsanga a convict tawh, kum li jail tang tura a lo tih tawh, ZPM-a thlem luh leh tawktarh chungchang chu Pu Nguna case chuan a lan chiang hle a ni,” a ti.
R Lalrinawma chuan, “Pu Nguna hian case ka neih ka hre lo, cheng khat mah ka ei ru lo va, anticipatory bail ka dil lo vang a tih angin a dil ta lo reng a, hemi hnu hian ACB-ah case a neih leh neih loh a va zawt a, case a neih thu an lo hrilh chauh a. Hemi hnu pawh hian anticipatory bail chu a dil ta lo va, a huaisen thlak hle a ni,” a ti.
Congress MLA C Ngunlianchunga hun lai khan, October 3, 2013 khan DPR siamna senso a pek leh compensation provision a awm loh avangin ram neitute leh LADC official-ten September 16, 2013-a meeting an neih bak a hnathawh tak tak leh zangnadawmna pek velte chu C Ngunlianchunga CEM a nih tawh loh hnu, MLA, minister a nih hnu veka a nih thu a sawi a. He thubuai hi rang taka ngaihtuah a nih a, dikna a lan chhuah thuai leh thil tidiklo an awm chuan an phu tawka hrem an nih thuai chu an duh dan a nih thu a sawi a. Court-ah rinna an nghah thu leh thudik hailan a nih ngei an duh tih a sawi bawk.