Aizawl: BJP Mizoram chuan nimin khan Bharatiya Jana Sangh (BJS) party dintu, Dr Syama Prasad Mukherjee thih chamah amah hriatrengna pual inkhawm an buatsaih.
An party pisa-a Dr Mukherjee hriatrenga puala ‘Balidan Diwas’ hmanah thu sawiin BJP Mizoram President Vanlalhmuaka chuan, West Bengal, East Pakistan-a bet mai tur India rama rin luh a nih dan te, India state dangte anga Jammu & Kashmir chu India rama rin luh a lo nih dan te leh kum 2019-a Article 370 nuai bo a nih dan te, Citizenship Amendment Act neih chho a nih dante chu Dr. Mukherjee-a’n hma a lak tawh a nih dan leh a hmalak dan zuia hmalakna kal zel a nih dan te sawiin, India ram tana thawhhlawk tak a nih thu a sawi.
Vanlalhmuaka chuan Dr. Mukherjee chu Gandhi rawtna angin, Nehru-a khan union cabinet minister ah dahin Liaquat–Nehru Pact-ah Pakistan hmaa India a tlawm tak em avangin Nehru-a nen ngaihdan inkalh an neih phah tih a sawi a. Nehru-a Cabinet atangin Dr. Mukherjee chu bângin October 21, 1951-ah vawiina BJP lo pian chhuahna party, Bharatiya Jana Sangh din a a lo ni ta tih a sawi.
“Dr. Mukherjee chu India rama informal opposition hmasa ber a ni a, India ram inpumkhatna atana a hnathawh leh a inpekna hi Congress party chuan kum 65 deuhthaw thup bo tum mah se, tun hunah chuan a chanchin pho chhuah leh mek a ni ta a ni,” tiin, BJP leh a kaihhruai sorkar chuan a hnathawhte a ngai hlu a. Dr Syama Prasad Mukherjee thih cham, ram tana a nun a hlanna ni hi an hmang chho ta tih a sawi.