Aizawl: MNF Sr Vice President Dr R Lalthangliana chuan India rama peace accord ziah tawhah Mizoram accord a hlawhtling ber tih a sawi.
Thawhtannia Mizo Hnam Run chhung inkhawmah Dr R Lalthangliana chuan, “Mizo hnam hi MNF dinchhan a ni a. Hnam lungphum nghet tak chunga ding, ram leh hnam hmangaihtute luankhawmna chu MNF hi a ni. Zofate inpui zalenna meichher chhitu kan ni a. He meichher hi a mit tur a ni lo va, thangthar lo chhuak zel turten kan chhawmnun zel a pawimawh,” tiin, Mizo hnam hmangaih tak takte tan MNF-ah hmun a awm reng tih a sawi.
Dr Thangtea chuan India ramah inremna, Peace Accord ziah a lo ni nual tawh a. Heng zinga hlawhtling ber chu Mizoram Accord, June 30, 1986 a nih thu a sawi a. MNF underground hruaitu, Laldenga leh Zoramthanga leh hruaitu hmasate ngaihtuahna fel vang a ni a, Mizo mipui inpekna leh tanrualna avangte, ram leh hnam tana martar-te vanga hlawhtling a ni tih a sawi.
Remna thuthlung hian Zofate tan rahchhuah tha tamtak a nei tih sawiin, Bill No 89 of 1986-ah, Constitutional Amendment 53, Article 371(G) dahbelhin, Mizoram chu Statehood-a puan a nih thu te, July 5, 1990-ah Guwahati High court, Aizawl Bench hawn a nih thu te, July 2, 2001-ah Central University (MZU) hawn a nih thu leh kum 2004 ah India/Mizoram leh Myanmar border trade Zokhawtharah hawn a nih thu leh, state danga awm ve lo, an sakhaw humhim tlat theihna telh a nih thu a sawi.