Agriculture Minister PC Vanlalruata’n kumin atang chuan phai buyer lianten Mizoram sawhthing an hre chho tan ve ta chu lawmawm a tih thu a sawi a; rate chhiat ber kumah pawh sorkarin sawhthing manah Rs vbc 85 chuang zet a seng tawh tih a sawi.
Nimin khan ZPM party-in an party pisa-ah chhung inkhawm an hmang a. He inkhawma thusawitu, Agriculture & Farmers Welfare Minister PC Vanlalruata chuan thlai thar market buaipui tak tak tur chuan thlai bawh bik an neih a ngaih thu a sawi a, nakkum atangin hmunphiah ro chu grade sawi lovin sorkarin a lei tur thu a sawi.
Agriculture minister chuan thlai thar lei chungchangah Chief Minister Lalduhoma chu fakawm a tih thu sawiin, “Sum leh pai harsatzia leh sawhthing rate chhiat ber kum a ni tih hre reng chungin kuthnathawktute tihbeidawn a duh lo va, a department changtu minister ka nihna ang pawhin ka lawm tak zet a. Zoram kuthnathawktute lawmthu sawina pawh ngaihthlak a nuam hle,” a ti.
Sorkarin direct-a sawhthing a lak zat hi qtl. 94,160 a ni a, support price a pek zat hi qtl. 1,21,740 a ni tawh a. June ni 21, 2025 thlenga sawhthing lak tawh zat belh khawm chu qtl. 2,15,900 zet a tling tawh tih sawiin tih sawiin PC Vanlalruata chuan, “Sawhthing rate chhiat ber kumah pawh sorkarin Rs vbc 85 chuang a seng tawh a ni,” tiin, kumin atangin phai buyer lianten Mizoram sawhthing an hre chho tan ve ta chu lawmawm a tih thu a sawi.
Hmunphiah chungchang sawiin PC Vanlalruata chuan, “Empanelled firm-ten sorkar rate anga lei turin an intiam a, an intiam anga an kal leh tak loh avangin kan bul tanna a fuh hlel deuh hlek a. Chuti chung chuan ZOHANDCO kaltlangin kumin March thla chhung khan sorkarin kg. 2,49,828 a lei a. Kum a lo thar ang a, hmunphiah ro chu grade sawi lovin sorkarin a lei dawn a ni,” a ti.
PC Vanlalruata chuan sorkar kal tawhte khan kuthnathawktute hi market chungchangah an lo vil zui na tawk lo deuh a, ZPM chuan thlai thar thlan bik pali neiin, chungho chu a buaipui hna sorkarin a thawk tawh a, a la thawk zel dawn bawk tih a sawi a. Heng thlai thlan bik mai ni lo hian buhhum pawh sorkarin tam tak a lei tawh thu a sawi bawk.