Hun harsa tak a tawh zingah 2017 kum kha atan hriatreng tawh tur a ni ngei ang. Album tlangzarh ‘Witness’ a flop a, a bialpa (tuna a pasal ni ta) Orlando Bloom (48) nen an inthen zuai bawk nen. A rilru mangang chuan intihhlum a tum hman hial niin, Katy Perry chuan a sawi.
Kum 40-na hmang mek Katy chuan khatih lai khan mimal leh professional ang pawhin ka nun chu a phel bawk a, ka kehchhe vek, a ti.
“Ka career kha a kual nasa a, a san telh telh hnuah tlem a inher danglam hret. Pawn lammi, midang tan chuan thil liantham pawh a ni lo. Mahse, ka tan chuan chhiat vekna tling a ni. Ka theihna zawng zawng ka hlan a, mahse ka kehsawm vek tho. Ka bialpa, tuna ka pasal nena kan inthen lai a lo ni bawk nen…” tiin The Sun chanchinbu a hrilh.
A nun pumpui maia mental health chungchanga buaina nei ve reng Katy Perry chuan hun harsa tak paltlang thin mah se, tunah chuan a tha tawh hle nia sawiin, “Lawmna chang hriatna hian ka nun hi min chhanchhuak ka ti lo thei lo. He thuruk hi hmuchhuak lo ni ila chuan, ka lungngaihnaah khan ka boral tawh ngei ang a, ka zuangthla daih te pawh a ni ang. Mahse, engkima lawm zel tur ka nihna hi ka hmuchhuak ta thung. Tlang hriatah ‘Ka lawm a ni, lawmna thinlung ka pu a ni’ han ti vak vak chi ka ni ve bawk si lo… sawi chhuah pawh harsa ka ti, a chhan chu mi zakzum tak ka nih vang a ni,” a ti bawk.
Hemi hma lamah hian kum 40-a upa chuan, a album tihchhuah ‘Witness’ in beisei a pha lova, a flop khan depression a neih phah. “Ka album ‘Witness’ dinhmun ka en khan ka rilru a na a, ka chau ngawih ngawih a, depression in min tlakbuak zui bawk. Inthiam lohna leh him tawk lova inngaihna ka neih phah nasa a, taksa leh rilru, thlarau lamah ka chau vek thei,” tiin a hun tawn khirh tak a sawichhuak.