US President Donald Trump-a chuan Thawhlehni khan Israel leh Iran inkara inkahhai kalpui tura inremna chu ‘a taka hman tan’ a ni tih a sawi.
American hruaitu hian inkahhai kalpui tan a ni hi Iran-in Israeli ram chhunga missile a kah luh hnu lawk ni mah se Middle East-a ram hnih inhal takte hi bawhchhe miah lo turin a vau lawk nghal.
“INKAHHAI CHU KALPUI TAN A NI TA, BAWHCHHE LO VANG CHE U,” tiin Trump-a hian a Truth Social platform-ah a tar lang.
A hmain US hruaitu hian ni 12 chhung indona chu inkahhai pumhlum hmanga tihtawp a nih thu leh darkar 24 awh tur hi Thawhlehni zing dar 04:00 (India-a zing dar 09:30) atanga hman tan turin a ni tih a sawi a. Iran-in a zawm hmasa ang a, Israel-in darkar 12 hnuah a zawm zui ve ang.
Iranian sorkar chanchinbu pawhin Israel-a thawh ngaa missile an kah hnuah inkahhai hi a taka hman tan a nih thu a puang a, an beihna hnuhnung berah hian Israel chhim lama mi pasarih vel an thi niin a sawi bawk.
Iran-a sorkar hnuai ni chiah lo, SNN news agency pawhin Tehran hian inkahhai puan hma lawkin missile eng emaw zatin a kap tih a tar lang ve bawk.
Missile-a beihna an tawh hnuhnung a tawp rualin Israel-a sipaite pawhin mipuite chu an inhumhimna leh a chhehvel an chhuahsan theih thu an puang bawk.
“Thil dinhmun inher mekah Home Front Command chuan ram pumah hmun him chin chhehvela awm tura tihna chu a hlip ta,” tiin sipai hian thu a chhuah.
Trump-a hian Tehran-in Qatar-a American sipai hmun a beih hnu lawkah Israel leh Iran inkara inkahhai hi a puang a. Kartawpa US-in Iranian nuclear hmun a kahna chhan letna chu Republican hruaitu hian ‘chhanna nep tak’ a nih thu a sawi bawk.
White House thuneitu chuan news agency Reuters hnenah Trump-a’n Israeli Prime Minister Benjamin Netanyahu biain inkahhai puan hi a rawtpui niin a sawi a. Israel hian Iran-in a beih loh chhung chu beih loh a pawm niin a sawi.
Iran pawhin Tehran chuan inkahhai puan inremna a pawm thu a sawi a; mahse, foreign minister chuan Israel-in boruak a titang zel a nih chuan an chhan let tur thu a sawi bawk.
Iran leh Israel hi Israel-in June 13 atanga Tehran a kah hnuah a intan a. US chuan kartawp khan Israel hi puiin Iran-a nuclear hmunte an kap ve a, Thawhtanni zanah Tehran hian chhang letin Qatar-a a sipai hmun a kahsak.
Israel-in Iran a kah chhan ber hi nuclear ralthuam siam a tum nia a puh vang a ni a; mahse, Iran chuan hei hi phain Supreme Leader Ali Khamenei chuan an siam duh a nih chuan ‘khawvel hruaituten min dang dawn lo’ tiin a sawi nghe nghe.