India chuan a chung zawn van sanga Pakistani airline-te thlawh a khapna chu thla khat chhung atana pawt seiin July 24 thleng a kalpui chhunzawm dawn.
Indian van boruak hi Pakistani sipai thlawhna telin an airline leh operator zawng zawngte thlawhna leh an hawh thlawhnate an thlawh khapna hi April 30 atang khan hman tan a ni.
He khapna hi April 22-a Indian awp Jammu & Kashmir-a Pahalgam-a mi firfiakten mi 26 an thah hnua Indian sorkarin Pakistan laka khuahkhirhna a kalpui zinga tel kha a ni.
Khapna kalpui hi May 24 thlenga kalpui tura tih kha a ni phawt a, thla khat pawh sei a nih hnuah thla khat dang pawh sei leh a ni.
Thawhtanni khan NOTAM (Notice to Airmen) tihchhuah thar niin thla khat dang, July 24, 2025 thleng khapna siam leh a ni ta a ni.
Hetih lai hian Pakistan pawhin a chung van sang chu Indian thlawhnate tan July 24 thleng thlawh khapna a tichhuak thar ve bawk a. April 24 khan Pakistan hian Indian sorkarin an ram nena Indus Water Treaty an siam a tihtawp lailawk chhan let nan India thlawhnate tan May 24 thleng an chung boruak hman a khap a, hei hi a pawt sei ve zel a ni.
Pahalgam-a mi firfiakte an chet tuk chiahah khan India hian Pakistan lakah khuahkhirhna leh hrekna na tak tak a kalpui a, heng zingah hian Indus Waters Treaty an hman pawh titawp lailawkin khawmuala an inkalpawhna, Attari a khar a, an inkar boruak a chhe hle a ni.