Aizawl: Chief Minister Lalduhoma chuan India sorkar hnuaiah Zofate an him tih a sawi.
Sorkar laipui Ministry of Culture kaltlanga hman tan, Samvidhan Hatya Diwas (Constitution Murder Day) chu Art & Culture bultumin nimin khan Vaivakawn Cultural Centre-ah hman a ni. Chief Minister Lalduhoma chuan khuallian niin a hmanpui.
Chief Minister chuan India danpui hnuaiah Mizo hnam leh sakhuate humhimna fel tak a awm a, ILP an nei bawk a, India sorkar hnuaiah Zofate hi an him tih a sawi thin thu sawiin, “Article 371G ah kan inhumhimna (special provision) fel taka dah a ni a, Eastern Bengal Frontier Regulation Act 1873 hmangin Inner Line Regulation leh non tribal ten kan ramah ram an neih ve theih lohna a awm bawk a. Danpuiin min humhim tlat avang leh democracy lungphum – zalenna – kan neih avangin he ramah hian kan him a ni,” a ti.
“Kan himna leh him lohna chu kan danpuiah a innghat a. He dan hi palzut a nih chuan engkim a lo derthawng nghal mai ang,” tiin, Mizote tana tha em em 6th scheduled kha ADC pathumah chauh a nun tak avangin tihnun thar leh tura inrawnkhawmte a that a rin thu a sawi bawk.
Inkhawmah hian khualzahawm, Art & Culture Minister C. Lalsawivunga leh Art & Culture Secretary Zodingpuii te pawhin thu an sawi.
June ni 25, 1975 khan khatihlaia India Prime Minister Indira Gandhi chuan Internal Disturbances chhuanlamin Article 352 hnuaiah Emergency a puang a. Thla 21 zet a awh a. Kumin hi a kum 50-na cham niin, sorkar laipui chuan Hatwa Diwas hmang tur hian ruahmanna a siam a. He Diwas hi kum khat chhung hman tur a ni.