Aizawl: Aizawl Tennis Court chhehvela chawhmeh zuar thinte chuan AMC Multi Complex Building, Tuikual South-a an thutin inhralh a harsa a, an mang a ang tawh hle tih sawiin, amahni dawrtute tana kal a harsatna hmun building chhawng sanga thutin awmzia a awm loh avangin AMC hotute chu an thut dan ngaia thuttir leh turin an ngen.
Nimin khan Tennis Court Bazar Welfare hruaitute chuan Aizawl Press Club-ah thu thar thehdarhtute an kawm a. Treasury Bazar-a chawlhkar tluana thu thinte leh anni, Inrinniah chauh kum 2000 hma lam atangin Aizawl Tennis court chhehvela thu thinte hi hriatpawlh an ni leh thin tih an sawi a. AMC a pian hnuah pawh The Street Vendors (Protection of Livelihood & Regulation of Street Vending) Act, 2014 hmanga an dikna leh chanvote humhim theih a nih dante hrilh tih sawiin, “Kawng chhuata kan chawhmeh zawrhte chu a thianghlim tawk loh hlauvin, kum 2017 khan kan thil zawrh dahna tur dawhkante min pek vek bakah ID te min siamsakin, thawhhona tha tak kan nei a ni,” an ti.
AMC Multi Complex building chu Treasury Bazar-a thu thinte tana sak a nih thu sawiin, “Building sak hi keini Inrinni chauhva kawng kama thu thinte tana ruahman a ni lo, Treasury Bazar-a chawlhkar tluana thute tan liau liaua sak a ni,” an ti bawk.
Smart City kalpui mekah hmun dang kawng dunga inzuarte pawh tihtawp vek a ni dawn tih avangin building-a thu tura tih an ni chu thuawih takin an lut. Mahse, thla thum hnuah pawh hmun dang bazar tihtawp tumna a awm lo tih an hriat thu an sawi a. A tirah chuan building chhawng hnuai lamah parking-a lirtheite dah chhuakin thut tir an ni a, kawng bul maite a nih avangin an inhralhna pawh a la zia deuh a. Hun a kal zel a, Inrinni apiangin an thut dan tihdanglamsak niin an nawr zim telh telh tih an sawi.
Tun hnaiah mi 80 vel thut theihna turah mi 200 dawn an hnawh luh thu leh a then chu ke a kalna step-ah te thuttir an nih thu sawiin, kawng sira an thut thin laia an an lei chhuah thin zatve pawh an lei theih tawh avangin, chep taka thut teng hi an tan awmzia a awm loh avangin an harsatnate hriatthiampui a, kum tam tak an lo kalpui tawh an thut dan ngaia thuttir leh turin AMC hotute an ngen tih an sawi bawk.