Aizawl: Information & Communication Technology (ICT) Minister Dr Vanlalthlana chuan sorkarin lehkha hmanga file system kalpui mek thlakna tur, e-Office kalpui tan niin, hei hian file kal a tihchak thu leh file bo a awm theih tawh lo bakah confidentiality atan pawh a tangkai tih a sawi.
Nilainia a pisa-a thu thar thehdarhtute a kawmnaah ICT minister chuan e-Office kalpui tan a nih dan sawi fiahin sorkar laipui, Department of Administrative Reforms & Public Grievance (DARPG) hnuaia State Collaborative Initiative Scheme (SCI) atangin Rs vbc 1.99 sengin chak zawk leh langtlang zawka sorkar file-te a kal theihna turin e-Office chu Go-Live niin April 18, 2025 atang khan hman tan a nih tawh thu a sawi.
Dr Vanlalthlana chuan Mizorama e-Office enkawl tur hian nodal department-ah Department of Personnel & Administrative Reforms (DP&AR) niin a enkawl hna chu Department of Information & Communication Technology a nih thu leh an software hman hi NIC siam a nih thu a sawi a. Deployment leh hosting hi RailTel tih a nih thu sawiin, “Secretariat building-a IT infrastructure pawh thuam that chhoh mek a ni. Hei bakah hian internet tha tak neih a pawimawh dawn avangin 1 Gbps backup line bakah, BSNL atangin redundant line tur 1 Gbps dark fiber nei turin hma lak mek a ni,” a ti.
ICT minister chuan a tirah secretariat-a department thlan bik pali, DPAR (GGT), ICT, school education leh PWD-ten an hmang hmasa a. Tunah chuan, secretariat-a department zawng zawng (41) bakah Chief Minister Office (CMO)-ah te hman a ni tawh,” tiin, e-Office hmang hian file 6,492 kaltir niin, heng file-te hi vawi 63,565 khawih chet tawh a nih thu a sawi.
e-Office hi a bikin minister, chief secretary, secretary leh senior officer-ten an hmang tangkai tih sawiin Dr Vanlalthlana chuan, “File kal hi a chakin a awm reina dawhkan hmuh theih vek a nih avangin tu mahin file an kawl rei ngai lo a tih theih. File pawimawhte pawh in lamah leh zinna thlengin a en khawih theih vek a. File bo a awm theih tawh lo bakah file ken kual a awm tawh loh avangin confidentiality atan pawh a tangkai em em a ni. Lehkhapuan hman a tlem tawh dawn avangin sorkarin sum tam tak a hum thei dawn bawk a ni,” a ti bawk.