MPCC Treasurer Dr Lalmalsawma Nghaka chuan ZPM sorkarin Mizoram Universal Health Care Scheme (MUHCS) a kalpuiah private hospital-te tel lovin a hlawhtling dawn lo tih a sawi a, kawng bo takin he scheme tha tak hi kalpui a tum tih a sawi.
Nilaini khan Aizawl Press Club-ah thu thar thehdarhtute kawmin MPCC Treasurer Dr Lalmalsawma Nghaka chuan tunah hian MUHCS hi sorkar hospital-ah leh private hospital thenkhatah chauh kalpui a nih thu a sawi a. Mizorama damdawi in lian pahnih, ZMC&H leh Civil Hospital hian a dawl zawh dawn loh avangin private hospital-te tel lo chuan he scheme tha tak hi a hlawhtling dawn lo tih a sawi.
Private Hospital neitute hi sorkar hian an duh ang barhluih tumin hma a la nia a hriat thu leh vauna tawngkamte pawh sorkar lam atanga chhuak chu pawi a tih thu a sawi.
Dr Lalmalsawma Nghaka chuan ZPM sorkar hian an duh anga engkim kalpuiin zawm turin private hospital-te a nawr lui nia a lan thu sawiin, “MUHCS kalpui a nih hmain private hospital-te nen awmze neia inbiain inremna an lo nei lawk vek tur a nih laiin, ZPM sorkar chuan kawng bo takin he scheme tha tak hi kalpui a tum a ni. Hei hian administration an hriat lohzia leh an thiam lohzia a lantir a ni,” a ti.
MUHCS-ah hian tun thlengin mi 5,000 vel chauh an la inziak lutte hi mipui lam pawhin rinhlelhna an la nei lian hle tih sawiin MPCC treasurer chuan, “A bikin sorkar hnathawk harsatna tawk pawh an awm nual tawh a ni. Sorkar damdawi in lian, ZMC leh Civil Hospital-ah khum chan a har bawk si a, emergency tak taka inzai ngai te, nau veite an awm a, private hospital an pan loh theih loh hun a lo awm a, buaina a thleng chho mek a ni,” tiin, heng thil lo thlen chhan chu sorkar ruahmanna fel loh vang leh kalphung hriat loh vang a nih thu a sawi.
MPCC treasurer chuan ZPM sorkarin MUHCS mumal lo taka kalpui a tum hi ngaihtuah tha lehin, private hospital-te nen inremna neihpui thuai se, hlawhtling takin kal se, mipuiin private hospital hrang hrangah hman a nih theihna turin ching fel thuai rawh se tih chu an duh dan a nih thu a sawi bawk.