- K. Hmingthankaia
Kum kua vel kaltaah khan, ‘ Sex leh Sual’ tih article ka lo ziak tawh. Tu tute emaw chuan in chhiar tawh maithei. Bible hian zu in ngawr ngawr chu a haw vakin a lang lo. Zu ruih erawh a that loh thu leh hmuhsitawm tak a nih thute chu min hrilh nual a ni. Nupa kar ni lova sex hman erawh a haw hle thung. Nupa karah pawh Poula phei chuan, fel taka hmang zo thuai tur leh tawngtai leh vat turin min duh a ni. Zu ngawl leh sex ngawl vei tawh pawh inchhira an sima, dik taka an pianthar phawt chuan Pathianin a ngaidam duh reng tih erawh hria ila.
Zu nge sex hman khawloh chu mihring tan pawi thui zawk ang le? Mihring panngai lo piangchhuak tam zawk mah, a bikin mipa hi chu thawkkhat lai na na na chu zu han in chang nei tura ngaih deuh a ni. Mahse, zu chu in mah se, harhfim leh hun an nei a, an pangngai leh mai thin a ni. A ngawl vei tawh pawhin nghei hun a nei ve thei mai bawk a, chhungkaw tan leh khawtlang tan, ram tan leh kohhran tan mi tangkai tak an lo ni leh thei mai thin a ni. Anmahni pawh an lo hrisel lehin an hmel pawh a lo mawi leh mai thin. Chutiang mite chu tumahin an zu in lai kan hriatsak reng tawh lo.
Sex hmang khaw lo tawh chu sim leh pawh nise, mi thinlungah enge maw ser a awm tlat tawh a, uire ngat phei chu a pasalin a ngaidam emaw, ngaidam lo emaw pawh nise, mite thinglungah za a zain pawm mam mawi a theih tawh thin loh. Damchhung a daih tawh thin a ni. Mahse, inchhira a sim takzet chuan Lapa’n a ngaidam thei. Sex vanga Aids natna vei phei chu tihdam theih tawh loh a nih mai bakah, midang an kaichhawn thei a, nau an pai phei chuan nauteah an kaichawn zel thei a ni. Anmahni tan leh midang tan, kohhran leh ram leh hnam tan a pawi em em a ni.
Chuvangin, mi zawng zawng, sex hmang tum leh hmang duhte hi kan khapbet seng thei ngawt si lova, an hman dawn rau rau chuan, an damchhung atana pawi thei leh, an hriselna tichhe thei leh an nun titawi theitu aid natna laka an him theih nan Condom hmang turin Sawrkar leh NGO-ten an ngen thin a, condom an sawimawi thin a ni. Sex hman khawlohna tamna leh aid vei tamna ram nih hi a zahthlak a, Sawrkar leh NGO pawhin an vei em em a, kohhran pawhin a vei a, zirtirna hrang hrang an tichhuak thin a nih hi.
Chutiang bawkin mi zu in duh hi kan khap ngawt seng vek thei si lova. Mahse, zu chhe lutuk, chawrche vatna leh thih thuai theihna an in thin hian, anmahni tan leh midang tan, an chhungkaw tan leh ram leh kohhran tan a pawi a, a mualphothlak a, hmasawnna daltu a ni bawk a ni. Chuvangin, Sawrkar leh thil chik mi leh mi thahnemngaiten zu tha in hram hram turin an duh a, zu chhia tihbo an duh a ni.
Nimahsela, zu tha awmtir leh sawimawi chu kohhranho chuan, zu in tura inzirtirna, zu tihzalenna, zu in sawimawina, Setana lam tang tiin, an inrawlh lohna tura lo inrawlh ziahin, mi mawl thenkhat leh lal ve chak em em Opposition-ho thurualpuiin, Sawrkar chu an um tlan leh nge nge thin a ni.
Chutihlaiin, Condom hman inzirtir leh sawimawi chu, Pathian huat em em sex hmang uar tura inzirtirna, sex hman thlah zalenna, sex hman pawi tihlohna, Setana lam tang tiin an do leh chuang si lova. Do a hnekin Pulpit atangin an sawimawi tep tawh zawk a nih hi. Thenkhat chuan an sawimawi tawh hial maithei bawk. Sawimawi tur a ni reng a ni.
Chutichuan, hengte hi lo inzawt ila- Zu chhe in nge pawi Sex hman khawloh? Mi zu in duh leh sex hmang duh hi kan khap bur vek thei tak tak em? Thil tha lo rau rauah, a tha lo lehzual thleng tur hi a theih dan danin kan vengin kan do tur a ni lo em ni? Nge, kohhran hian zu tha chu do zelin zu chhia a tipung zel dawn? Sex leh aid chu a pawi vak lo tiin, Condom hman chu fak mawiin sex chu tizalenin, aid leh thihna chu a tipung zel dawn? Nge, zu tha zawrh pawh a do chuan, mi hriselna atana tha zawk tura tih tho condom pawh chu a do ve dawn?
Lengzem magazine June 2025 ‘ An ti’ tih huang ami ang khan, zu chhia hi kohhran zu kan ti anga, zu tha hi sawrkar zu kan ti mai dawn em ni?
He hun hnuhnungah hian Thlarau thu tak tak chu nung taka sawi theih a nih tawh lohnaah hian, kohhran thil tih reng reng pawh Khawvel thil deuh tak nena tih a tul tawh hunah hian, khawvel thil taka tha leh mihring thil taka tha ‘Zu tha’ in leh ‘Condom’ hman hi kan sawimawi tawh mai dawn lawm ni?