Aizawl: PHE Minister Prof. Lalnilawma’n nimin khan Assam Rifles chhuahsan tak, Lammual hmun thenkhata tui hna awmnate bakah Hunthar lei tla hniama tui putna leh Helen Lowry School, Seventh Day Tlang Girls Hostel-a pipe thawmthat ngaite chu a endik.
Minister Prof. Lalnilawma chuan Assam Rifles chhuahsan tak, Lammuala tuihna tha tak awm chu mumal taka hmalakna a awm loh chuan a bulhnaia in dinglai tan chhiatna a thlen theih thu sawiin, tui khawlkhawmna tur mumal tak siam a, vantlang tana hman tangkai theih tura ruahmanna kalpui a tul thu a sawi a. Lei tla hniam avanga PHED pipe kal dan siamthat ngaite pawh department thawktute nen an en ho va, hmalak dan turte an sawi ho nghal bawk.
PHE Minister chuan Hunthar lei tla hniam leh Helen Lowry School-a tui putna hmun a endikna hunah hian, hemi avanga harsatna lian zawk a thlen loh nan leh khawtlang him nan tui luan kawr tha siam ngaih pawimawh hmasak a tul thu a sawi a. PHED pipe put an hria a nih chuan mobile phone atangin ‘Water Leak Reporter’ apps hmangin awlsam takin PHED-ah report a thehluh theih thu a sawi a. Report thehluh atanga hun rei loteah thawktute’n pipe leak thawmthat hna an bawhzui nghal zel thin thu a sawi.
PHE Minister hi PHED CE pahnih Er. Ngentluanga leh Er. K. Zohmingliana; Er. Lalrinzuala Ralte, SE; Er. Lalzuimawii, EE, Er. J. Kapkima, EE leh Aizawl DC aiawhte bakah khawtlang hruaitute’n an tawiawm a ni.