Indian Defence Minister Rajnath Singh-a’n ramria buaina an neihte rin tha tura a sawmna chu China chuan chhangin sawiho leh tifel tura enho an inpeih reng tih a sawi.
Chinese foreign ministry thupuangtu, Mao Ning-i chuan Singh leh Chinese Defence Minister Admiral Dong Jun te an inkawm atanga ni li hnu, Thawhtanni khan an ram ngaih dan hi a puang a, ramria buaina chu chin fel a tul thu a sawi.
“China chu India nen kan inkara thil awm, tiamchin nei lova indawr tur leh ramri sawi turin a inpeih reng a. Ramri hi muanin langtlang sela, ramri kâna thil tih leh thawhho pawh tha a ti em em a ni,” tiin Mao-i hian Beijing-a thuthar lakhawmtute a kawmnaah Singh-a thil sawi chungchang a sawi.
India leh China hian Line of Actual Control (LAC)-a Ladakh sector-a an sipaite kum li chhung an inepna tang tak chu October khan tifelin vawi tam tak inbiain an sawiho va. Ramri chungchanga inbiaknaah hian India atangin National Security Adviser Ajit Doval leh Chinese Foreign Minister Wang Yi te pawh an tel.
Mao-i chuan ramri tifel tur hian hun a duh tih a hriat thu leh India chuan China thawhpuia muanawm taka thil an chin fel ngei a beisei tih a sawi.
“Ramri hi thil harsa tak a ni a. Hetih lai hian a lawmawm lam ve thungah chuan ram pahnihte hi level hrang hrangah inbiain thil thui tak an lo kalpui tawh a ni,” a ti.
June, 2020 khan Galwan Valley-ah ram pahnih sipaite hi an intualvuak chiam a, Indian sipai 20 thiin Chinese sipai pali an thi ve thung a, hemi hnuah hian kum 60 chhunga ram pahnihte inkar a chhiat lai ber a thleng zui.
Ningani khan Singh-a hian Qingdao, China-a Shanghai Cooperation Organisation (SCO) Defence Ministers’ meeting-ah Chinese defence minister hmuin an buaina chu ‘nghet taka ching fel turin kal dan tur siam’ tha an tih thu an sawi a ni.
Singh leh Dong inbia hian indawr chhunzawm zel ni se an ti a, sipai inhnukkirna te, inepna boruak tihdan leh ramri enkawl chungchangah pawh tiamchin awm lova inbiak zel tha an ti.
Ram pahnih inkar tihthat thar leh mek zingah hian Tibet-a Hindi sakhaw biak zinna, Kailash Mansarovar thleng kal pawh chhunzawm leh a tel a. Thlawhnaa inkalpawh leh pawh tha an ti bawk.