Aizawl: Aizawl East II bialtu MLA B Lalchhanzova’n MLA fund atangin Tuithiang branch YMA tan ambulance a pe.
Thawhtanni tlai khan ambulance hlanna inkhawm hi Govt Tuithiang Middle School hall-ah neih a ni. Bialtu MLA-in motor lehkha pawimawh chu Tuithiang YMA President SH Lalropuia hnenah a hlan.
Ambulance hlanna inkhawmah Supply Minister ni bawk, B Lalchhanzova chuan hma an sawn zelna turah mahni veng an hmangaih a tul rualin, mahni veng bil chauh an hmangaih erawh chuan veng dang tan harsatna a awm thei a, ngaihtuahna fim nen mahni veng an hmangaih thiam a tul tih a sawi.
B Lalchhanzova chuan khawtlang tana hna an thawhna kawngah thil tha tizawnga hnathawh hi an tihtur a nih thu a sawi a. Khawtlang hian a mi chengte kaltlangin malsawmna dawn let a phut tih a sawi a. MLA-in kum khat chhung atan MLA Fund Rs nuai 200 an neih chu rual khai taka hma an sawn theihna turin a daihzai thei ang zelin an insem tlang zel dawn tih a sawi bawk.
Bialtu MLA in Tuithiang Veng Branch YMA tana Ambulance a pek, Suzuki Eco Van hi MLA Fund 2025-2026 kaltlanga a pek niin, Rs nuai 7 vel seng lei a ni.