Aizawl: Mizoram Merchant Association (MIMA) chuan nimin khan Home Minister K Sapdanga chu a pisa-a kawmin, Inner Line Permit (ILP) uluk leh felfai taka kalpui turin an ngen.
Home Minister nena an inkawmnaah MIMA hruaitute chuan, Mizoramah rel lut tur hian thatna tam tak a neih rualin, hnam tan that lohna pawh a keng tel ngei dawn nia an hriat avangin ram leh hnam a la him hram hram theihna a nih beiseiin ILP chu uluk leh felfai tak, khauh taka kalpui turin an ngen.
MIMA hruaitute chuan tun hmaa ILP kalpui danah tha viauin lang mah se, thenkhatah duhkhawp lohna a awm thin thu an sawi a. Vishal Mega Mart neitupa Rajesh Mishra trade license neih danah, Mizo ni lote’n trade licence an dil chuan kum hnih nung ILP an neih a ngai tih a nih laiin, RTI-a an zawhna chhannaah Rajesh Mishra chuan February ni 28, 2017 khan kum hnih dam ILP a dil a, a dil hma ni sarih (21.2.2017)-ah trade license a hmu daih tawh tih an sawi a. Hei bakah Ranijani, Meerut, UP a mi chuan Lengpui Airport ah Temporary ILP a dila, chu ILP an pekah chuan a phone number ziah turah a blank-in pek a ni a, purpose of visit ah puanthan zuar tih a ni bawk a. Puanthan hi a rawn zuar dawn em ni tih tur a ni. Hetiang a nih avang hian rel meuh a lo lut dawn a ni a, uluk leh khauh taka ILP enforce dan kawng ngaihtuah hram hram turin Home Minister hi an ngen a ni.
- HM-a rawtna thlen:
- Rel lo luhna tantir Bairabi Rail Sation a, tuna ILP Checkgate hi tih changtluna, fimkhur leh uluk taka ILP hi pek chhuaha, ILP neisa thlenga uluk taka check mai bakah, computerise vek ni se.
- Bairabi leh Sairang Rail Station nen a inkar Roadside station leh Halt station, Sairang Station thlenga chhuk leh lo chuang lutte, uluk leh fimkhur taka ILP hi tih nise.
- Sairang Rail Station pawh Passenger-te kal darh nghal mai theih loha hung bawk nise tiin MIMA hruaitute chuan an ngen nghal a ni.