Joao Pedro chuan Brighton atanga Chelsea a zawm fel hnuah Club World Cup quarter-final-a Palmeiras an hmachhawn turah a inlan thei nghal dawn.
Brazil forward hian kum riat daih contract ziakin a man hi £ maktaduai 60 a ni.
Kum 23 mi hi an ram atangin United States-ah thlawk lutin medical thil a tifel a, Inrinni zana Palmeiras nen Philadelphia-a an inkhelh turah a tel thei nghal dawn a ni.
Fluminense youth academy chhuak hian kum 2023-a Watford atanga Brighton-in an club player man to ber ni tura £ maktaduai 30-a an lak luh hnuah vawi 70 khelhsakin goal 30 a thunsak hman tawh.
“Tute pawhin club lian leh chanchin ropui tak nei a ni tih an hre vek,” tiin Pedro hian Chelsea chungchang chu a sawi a. “Tun hma pawhin player ropui tak tak an lo kawl tawh a, tunah pawh ropui tak tak an la nei bawk a, ka zawm ve thei hi ka phur tak zet a, Chelsea player chuan thil pakhat ngaihtuah ngei an neih thin chu chak tih a ni,” a ti.
Chelsea hian £ maktduai 55-in English winger Jamie Gittens lak tumin an dawr bawk a, Borussia Dortmund pawhin an pawmpui tawh.
Kum 20 erawh hi chu Dortmund tan Club World Cup-ah a lo inlan tawh avangin Blues tan a inlan ve thei tawh dawn lo.
Inelna tan hma khan Liam Delap, Mamadou Sarr leh Dario Essugo ten Chelsea hi zawmin group stage khel tur khan an ziak luh hman vek.
Brighton head coach Fabian Hurzeler chuan, “Inleina hi a tute tan pawh a tha a. Club tan pawh player hralhna tha tak a ni a, khelmuala sum kan siamna kawngah a hlawk a, hmatawngah tha tak tak dang kan nei sa bawk a ni,” a ti.
“Joao-a tan pawh insawnna duhthusam a ni a, season lo awm turah Champions League football khelhna hun tha a nei dawn a, nakum nipuia World Cup khelh turah pawh Brazil team-a a tel theih nan insiamna remchang a ni dawn bawk a ni,” a ti.