Aizawl: Urban Development & Poverty Alleviation (UD&PA) Minister K. Sapdanga hovin nimin khan Aizawl khaw chhunga chawhmeh zuar, kawngkama thu thinte thutna tur hmun rem zawk chungchang ngaihtuahin an thutkhawm.
UD&PA Minister K Sapdanga pisa-a thutkhawmah hian Aizawl khawpui chhung kawngpui kam leh footpath-a chawhmeh pho leh zawrh chhuah thin chuan lirthei chetvelna a tihbuai mai bakah mihring kalna tur a dal thute, kawng a chep phah avanga lirthei khalhtute, kawng sira thute leh kawnga kalte tan pawh a him loh thute sawi a ni. AMC in veng hrang hranga market a sakte pawh luah khah loha an awm mek thute sawi a ni.
Tennis Court bula chawmhmeh zuara thu thinte harsatna sukiang tur leh an thutna tur hmun ngaihtuah turin Working Committee din an rel a. Committee Convenor-ah AMC Commissioner bakah Aizawl DC, Aizawl SP leh Traffic SP te member atan ruat an ni.
Working Committee hian Aizawl veng hrang hranga chawhmeh zuara kawngkama thu thinte traffic tibuai lo leh felfai zawka an thut theihna tur hmun an ngaihtuah dawn a ni.
Thutkhawmah hian AMC Mayor Lalrinenga Sailo, Deputy Mayor R. Thanglura, Commerce & Industries Commissioner Dr. Lalzirmawia Chhangte, UD&PA Secretary Lalmalsawma Pachuau, Information & Public Relations Secretary Betsy Zothanpari Sailo, AMC Commissioner Joseph H. Lalramsanga, Aizawl DC Er. Lalhriatpuia, Aizawl SP Rex Zarzoliana Vanchhawng, Sr. SP Traffic Ruatsanga Ralte bakah Khatla leh Tuikhuahtlang local council aiawhte an tel.